ارىستانبەك مۇحامەدي ۇلى بوكستان ق ر ەرلەر قۇراما كومانداسىن قۇتتىقتادى - فوتو
قىتايدا وتكەن بوكستان ەرلەر مەن ايەلدەر اراسىنداعى ازيا جانە مۇحيت ەلدەر اراسىنداعى وليمپياداعا ىرىكتەۋ تۋرنيرىندە بوكستان قازاقستان ەرلەر قۇراماسى وليمپياداعا بەرىلەتىن 10 جولدامانى تۇگەندەپ الدى، دەپ حابارلادى ۆەدومستۆونىڭ باسپا ءسوز قىزمەتى.
«سىزدەر ەلىمىزدىڭ اتىن بۇكىل الەمگە تانىتقان داڭقتى قازاق بوكس مەكتەبىنىڭ تۇلەگىسىزدەر. تىنىمسىز ەڭبەك پەن قايسار مىنەزدىڭ ناتيجەسىندە سىزدەر تولاعاي تابىسقا قول جەتكىزىپ، بۇيىرتسا ريو-دە-جانەيرو وليمپياداسىندا جاسىنداي جارقىلداپ جۇلدەلى ورالاتىندارىڭىزعا كامىل سەنەمىن. بۇل جولى تاۋەلسىزدىك العاننان بەرى تۇڭعىش رەت بوكستان ەرلەر قۇراماسى وليمپيادا دوداسىنا تولىق قۇرامدا 10 سالماق دارەجەسىندە بارماق، بۇل ءبىزدىڭ ۇلكەن جەڭىسىمىز، بوكستا كوشباسىنداعى مەملەكەت ەكەنىمىزدىڭ ايقىن دالەلى.
سىزدەرگە زور تابىس، جارقىن جەڭىس پەن تەمىردەي دەنساۋلىق تىلەگىم كەلەدى! ەل نامىسىن، ەر نامىسىن قولدان بەرمەيتىندەرىڭىزگە سەنىمىم مول!» دەلىنگەن ءمينيستردىڭ قۇتتىقتاۋ جەدەلحاتىندا.
ەسكە سالا كەتەيىك، ءبىزدىڭ ۇلتتىق قۇراما العاش رەت وليمپيادا ويىندارىنا تولىق قۇرامدا بارماق. ۇلتتىق وليمپيادا كوميتەتىنىڭ مالىمەتتەرىنە سايكەس، بۇعان دەيىن ەرلەر قۇراماسى 1996-جىلى اتلانتاعا 9 بوكسشىمەن، 2000-جىلى سيدنەيگە 7 بوكسشىمەن، 2004-جىلى افيناعا 8 بوكسشىمەن، 2008-جىلى بەيجىڭ وليمپياداسىنا 9 بوكسشىمەن، ال 2012-جىلى لوندون وليمپياداسىنا 9 بوكسشىمەن بارعان بولاتىن. ازيا جانە مۇحيت ەلدەرى اراسىندا وتكەن ىرىكتەۋ جارىسىندا ەل قورجىنى 7 جولدامامەن تولىقتى، ونىڭ بىرەۋىن قىزدار اراسىندا سىنعا تۇسكەن داريعا شاكىموۆا يەلەنگەن (75كەلى). ەرلەر قۇراماسىنان جولداما العاندار ولجاس ساتتىبايەۆ (52 كەلى)، قايرات ەراليەۆ (56 كەلى)، ابىلايحان ءجۇسىپوۆ (64 كەلى)، جانىبەك ءالىمحان ۇلى (75 كەلى)، ادىلبەك نيازىمبەتوۆ (81 كەلى) جانە يۆان دىچكو (91+ كەلى).
بۇعان دەيىن 4 جولدامانى دانيار ەلەۋسىنوۆ (69 كەلى) دوحادا وتكەن الەم چەمپيوناتىندا، ۆاسيلي ليەۆيت (90 كەلى) - WSB جوباسىندا، ءبىرجان جاقىپوۆ (49 كەلى) جانە بەرىك ابدراحمانوۆ (60 كەلى) - AIBA Pro-Boxing جوباسىندا العان بولاتىن.
وسىلايشا ۇلتتىق قۇراما قورجىنى ەرلەر بوكسىنان تولىقتاي 10 وليمپيادا جولداماسىمەن قامتىلسا، قىزدار بوكسىندا ازىرگە 1 جولداما بار، قالعان 2 جولدامانى بوكسشى قىزدارىمىز استانادا وتەتىن الەم چەمپيوناتىندا ەنشىلەۋگە تىرىسادى.
