استانا اۋەجايىندا «بەك ەير» ۇشاعى شاسسيىنىڭ شىقپاي قالۋى سەبەبى انىقتالدى

استانا. قازاقپارات - «بەك ەير» اۆياكومپانياسى استانا اۋەجايىندا Fokker-100 ۇشاعى شاسسيىنىڭ شىقپاي قالۋى سەبەبىن انىقتادى.

«قازىرگى كەزدە وقيعانىڭ شىن مانىندەگى سەبەبى انىقتالدى. سونىمەن، شاسسيدىڭ الدىڭعى تۇعىرىنىڭ شىقپاي قالۋىنا ۇشاقتىڭ شاسسي تۇعىرىن جيناۋ جانە شىعارۋ سيليندرىن باسقاراتىن گيدرواگرەگات سىمىنىڭ ءىشىنارا قارىسىپ قالۋى سەبەپ بولدى. ونىڭ سەبەبىن «بەك ەير» اۆياكومپانياسى ينجەنەرلىك-اۆياتسيالىق قىزمەتى Fokker-100 ۇلگىسىندەگى اۋە كەمەلەرىن جاساعان زاۋىتتىڭ تەحنيكالىق ماماندارىنىڭ قاتىسۋىمەن جانە كولىك پروكۋراتۋراسىنىڭ، اۆتسياتسيالىق وقيعالاردى تەكسەرۋ جونىندەگى كوميسسيانىڭ قاداعالاۋىمەن انىقتادى.

تاياۋداعى ۋاقىتتا Fokker-100 ۇلگىسىندەگى اۋە كەمەلەرىن جاساعان زاۋىت «بەك ەير» اۆياكومپانياسىنا رەسمي قۇجات جولدايدى جانە ول اۆياتسيالىق وقيعالاردى تەكسەرۋ كوميسسياسى مەن كولىك پروكۋراتۋراسىنا بەرىلەدى، سونداي-اق «بەك ەير» اۆياكومپانياسىنىڭ سايتىندا جاريالانادى»، - دەلىنگەن اۆياكومپانيانىڭ مالىمدەمەسىندە.

ءسويتىپ، Fokker-100UP- F1012 اۋە كەمەسىمەن بولعان وقيعانىڭ سەبەبى پايدالانۋ كەمشىلىكتەرىنەن ەمەس، كونسترۋكتسيالىق-وندىرىستىك كەمشىلىك ەكەنى قۋاتتالدى.

«مۇنداي كونسترۋكتسيالىق-وندىرىستىك كەمشىلىكتەر قاشان شىققانىنا قاراماستان كەز كەلگەن اۋە كەمەسى ۇلگىلەرىندە بولادى جانە ودان الەمدەگى ەشبىر اۆياكومپانيا ساقتانىپ قالا المايدى. اۋە كەمەسىنىڭ ۇشۋىن ويداعىداي اياقتاۋ ءۇشىن ونىڭ كابيناسىندا بىلىكتى جانە تاجىريبەلى ەكيپاج بولۋى ءتيىس، «بەك ەير» اۆياكومپانياسىنىڭ ەكيپاجى مىنە وسىنداي ىلكىمدىلىك كورسەتە ءبىلدى. «بەك ەير» اۆياكومپانياسىنىڭ ەكيپاجى مۇشەلەرى ق ر ينۆەستيتسيالار جانە دامۋ مينيسترلىگىنىڭ ازاماتتىق اۆياتسيا كوميتەتى ماقۇلداعان امستەردام قالاسىنداعى «CAE training center»  وقۋ-جاتتىعۋ ورتالىعىندا وقۋدان جانە ءالسىن-ءالى جاتتىعۋدان (التى ايدا ءبىر رەت) ءوتىپ تۇرادى»، - دەپ اتاپ وتىلگەن حابارلامادا.

سونىمەن بىرگە، Fokker-100 ۇلگىسىندەگى اۋە كەمەلەرىن جاسايتىن زاۋىت وكىلدەرى Fokker-100 ۇلگىسىندەگى ۇشاقتاردا مۇنداي كونسترۋكتسيالىق- وندىرىستىك كەمشىلىك كوپجىلدىق بۇكىل تاريحىندا العاش رەت بولىپ وتىرعانىن اتاپ ءوتتى جانە «بەك ەير» اۆياكومپانياسى ەكيپاجى ءىس-قيمىلىنىڭ سالقىنقاندى جانە ساۋاتتى بولعانىن وڭ اتاپ ءوتتى، سونداي-اق تاياۋداعى ۋاقىتتا سەرۆيستىك بيۋللەتەن شىعارىلاتىنىن جانە Fokker ۇشاقتارىنىڭ اۋە كەمەلەرىنە قىزمەت كورسەتۋ باعدارلاماسىنا تولىقتىرۋلار ەنگىزىلەتىنىن اتاپ كورسەتتى.

ەسكە سالا كەتەيىك، 2016-جىلعى 27- ناۋرىزدا  قىزىلوردا - استانا باعىتى بويىنشا Z9-2041 رەيسىن ورىنداعان «بەك ەير» اۆياكومپانياسىنىڭ ۇشاعى استانا قالاسىنىڭ اۋەجايىندا اپاتتىق جاعدايدا قوندى. استانا قالاسىنىڭ اۋەجايىنا قونۋعا بەت العان كەزدە ەكيپاج شاسسيدىڭ الدىڭعى تۇعىرى اشىلماي تۇرعانىن باياندادى. شاسسي تۇعىرىن قوسالقى (قولمەن) شىعارۋعا تىرىسۋ ارەكەتى ناتيجە بەرمەدى. وسىعان بايلانىستى ەكيپاج بۇل جاعدايداعى قاجەتتى بارلىق شارالاردى قولعا الدى. قونۋ الدىڭعى شاسسي تۇعىرىنسىز اتقارىلدى. قونۋ ويداعىداي ءوتتى. 116 جولاۋشى مەن 5 ەكيپاج مۇشەسىنىڭ بىردە-ءبىرى زارداپ شەككەن جوق. بورتتىق ءنومىرى UP- F1012 Fokker-100 اۋە كەمەسى ازداپ ءبۇلىندى جانە قالپىنا كەلتىرۋگە جاتادى.

وقيعانىڭ ءمان-جايىن انىقتاۋ ءۇشىن ق ر ينۆەستيتسيالار جانە دامۋ مينيسترلىگىندە اۆياتسيالىق وقيعالاردى تەكسەرۋ جونىندە كوميسسيا قۇرىلدى، وعان امستەردام قالاسىنان (نيدەرلاندى كورولدىگى) كەلگەن Fokker-100 ۇلگىسىندەگى اۋە كەمەلەرىن جاسايتىن زاۋىتتىڭ تەحنيكالىق ماماندارى قوسىلدى.

2016-جىلعى 31- ناۋرىزدا «بەك ەير» اۆياكومپانياسى ينجەنەرلىك-تەحنيكالىق قىزمەتىنىڭ جانە Fokker-100 ۇلگىسىندەگى اۋە كەمەسىن جاسايتىن زاۋىت وكىلدەرىنىڭ كۇشىمەن اۋە كەمەسى ءىشىنارا قالپىنا كەلتىىرىلدى جانە ءوز اياعىمەن الماتى اۋەجايىنا ۇشىپ كەتتى، وندا جۇمىستار جالعاستىرىلدى.