قازاق قىزدارى قاشان وليمپيادانى باعىندىرادى؟

استانا. قازاقپارات - ەرتەرەكتە سپورت تاقىرىبىندا بىرەر ءسوز بولا قالسا، كوز الدىمىزعا بۇلشىق ەتتەرى ويناعان، جاۋىرىنى قاقپاقتاي، جۇدىرىعى توقپاقتاي اتپال ازاماتتار ەلەستەي كەتەتىن.

بۇگىنگى تاڭدا ارۋلارىمىز بۇل قاعيدانى 180 گرادۋسقا بۇرىپ، وزگەرتىپ جىبەردى. سپورت تەك «ەرلەردىڭ ءىسى» ەمەستىگىن دالەلدەدى.

ايتالىق، سپورتتىڭ اۋىر اتلەتيكا، بوكس، كۇرەس سياقتى تۇرلەرى ەرەكشە فيزيكالىق دەنە كۇشى مەن پسيحولوگيالىق توزىمدىلىكتى تالاپ ەتەتىنى ايدان انىق. بۇل اۋىر سپورتقا جىگىتتىڭ جىگىتى عانا توزە الادى.

ءبىراق، قازىرگى تاڭدا وسىنداي اۋىر سپورت تۇرىمەن اينالىسىپ جۇرگەن ارۋلاردى ءجيى كەزدەستىرەمىز. الەمدىك سپورت دامىعان سايىن سپورتپەن تۇراقتى اينالىسىپ جۇرگەن نازىك جاندىلاردىڭ قاتارى دا جىل سايىن ارتىپ كەلەدى. سول ارۋلاردىڭ ىشىندە قازاق قىزدارىنىڭ دا وزىندىك ورنى بار. وزگە ۇلتتارمەن تەرەزەسىن تەڭەستىرىپ، وليمپياداعا قاتىسقان قازاق قىزدارى دا جەتەرلىك.

ءبىراق، ءدال بۇگىنگە دەيىن قازاق سپورتىنىڭ تاريحىندا وليمپيادا چەمپيونى مەن جۇلدەگەرى بولعان قازاق قىزى جوق. تاۋەلسىزدىگىمىزگە قول جەتكىزىپ، دەربەس مەملەكەت رەتىندە بەس رەت قىسقى، بەس رەت جازعى وليمپيادا ويىندارىنا قاتىستىق. وكىنىشكە قاراي، قىسقى سپورتتان دا، جازعى سپورت تۇرلەرىنەن دە ءالى بىردە-ءبىر قازاق قىزى وليمپيادا جۇلدەسىنە قول جەتكىزە الماي كەلەدى.

قىسقى سپورت تۇرلەرىنەن ءبىرىنشى كەزەكتە كونكيشى ارۋىمىز كەنجەش سارسەكەنوۆانى اتاپ وتۋگە ءتيىسپىز. ول 1994-جىلى ليللەحاممەردەگى (نورۆەگيا)، 1998-جىلى ناگانوداعى (جاپونيا) وليمپيادا ويىندارىنا قاتىسقان. ودان كەيىن دە وليمپيادا ويىندارىنا قاتىسقان قىزدارىمىز بارشىلىق. شايبالى حوككەيدەن دينارا ديقانبايەۆا سولت-لەيك-سيتيدە، فريستايلدان جىبەك اراپبايەۆا ۆانكۋۆەردە ەل نامىسىن قورعادى. الايدا، جەڭىس تۇعىرى قازاق قىزدارىنا الىستان قول بۇلعادى.

سوچي وليمپياداسىندا تاريحتا العاش رەت قازاق قىزى قىسقى وليمپيادا ويىندارىندا التىلىققا ەنگەن بولاتىن. وندا فريستايلدىڭ اكروباتيكا تۇرىنەن شىمكەنتتىك جانبوتا الدابەرگەنوۆا قازاق قىزدارىنىڭ ىشىنەن تۇڭعىش بولىپ قىسقى وليمپيادادا جوعارعى ورىندى يەلەندى. وسىعان دەيىن قازاق ۇلتىنان شىققان بىردە-ءبىر نازىك جاندى سپورتشى اق وليمپيادادا وسىنداي جوعارى ورىن يەلەنىپ كورمەگەن. ال جازعى ءھام قىسقى وليمپيادانى قوسا العاندا، جانبوتا الدابەرگەنوۆا ءاليا ءجۇسىپوۆادان كەيىن ۇزدىك التىلىققا ەنگەن ەكىنشى نازىك جاندى سپورتشى اتانعان بولاتىن.

ال جازعى سپورت تۇرلەرىنەن وليمپيادا ويىندارىنا قاتىسقان قازاق قىزدارىنىڭ سانى قىسقى سپورت تۇرلەرىمەن سالىستىرعاندا الدەقايدا جوعارى. سولاردىڭ ىشىندە وليمپيادا جۇلدەگەرى اتانۋدان مۇمكىندىكتەرى مول بولعان كوركەم گيمناسشى ءاليا ءجۇسىپوۆا مەن مەرگەن قىزىمىز زاۋرەش بايبوسىنوۆانى ەرەكشە اتاپ وتۋگە بولادى. ءاليا ءجۇسىپوۆا بەيجىڭ وليمپياداسىندا بەسىنشى ورىننان كورىنگەنىن جاقسى بىلەمىز. سوڭعى ەكى وليمپيادادا تاەكۆوندوشى قىزدارىمىز دا جۇلدە الماسا دا وزدەرىن جاقسى قىرىنان كورسەتە ءبىلدى. الايدا ازىرشە قازاق قىزدارىنىڭ ءتورت جىلدا ءبىر وتەتىن ءدۇبىرلى دودادا باعى جانباي كەلەدى.

2010-جىلى تۇڭعىش رەت سينگاپۋردە وتكەن جاسوسپىرىمدەر اراسىنداعى وليمپيادا ويىندارىندا اۋىر اتلەت ارۋىمىز جازيرا جاپپارقۇل قازاق قىزدارىنان ءبىرىنشى بولىپ چەمپيون اتاندى. ءبىراق، بۇل جەتكىنشەكتەر اراسىنداعى دودا بولعاندىقتان كوپ جاعدايدا ەسكەرۋسىز قالاتىنى انىق. الايدا، جازيرانىڭ ەرەسەكتەر اراسىنداعى دودالارعا قاتىسقانىنا دا ەكى-ءۇش جىل بولىپ قالدى. وسى ارالىقتا اۋىر اتلەتيكادان قازاق قىزدارىنان شىققان تۇڭعىش الەم چەمپيوناتىنىڭ كۇمىس جۇلدەگەرى اتاندى.

وسىدان ءتورت جىل بۇرىن لوندونعا جولى تۇسپەگەن جازيرا بيىل ريوعا جولدامانى جەڭىپ العان بولاتىن. جۇرتتىڭ ەندى ول جەتكىنشەك كەزدەگى التىن جۇلدەسىن ەرەسەكتەر دوداسىندا قايتالاسا ەكەن دەگەن ءبىر عانا تىلەگى بار.

بيىل قازاق جۇرتى وسى قارىنداسىمىزدان زور ءۇمىت كۇتىپ وتىرعانى انىق. ءبىراق، قازاق قىزدارىنان تۇڭعىش وليمپيادا چەمپيونى جانە جۇلدەگەرى قاي سپورت تۇرىنەن شىعاتىنىن الداعى ۋاقىت كورسەتەتىن بولادى.

دەسە دە، قازاق سپورتىنىڭ جانكۇيەرلەرى «قازاق قىزدارىنان وليمپيادانى باعىندىرىپ، ەل تاريحىنا ءوز ەسىمىن كىم ءبىرىنشى بولىپ التىن ارىپتەرمەن جازار ەكەن» دەگەن وي مازالاپ جۇرگەنى بەلگىلى. الەۋەتى زور قىزدارىمىزدىڭ بارلىعىن ءتىزىپ شىقپاساق تا، جازيرا جاپپارقۇل، اننا نۇرمۇحانبەتوۆا (اۋىر اتلەتيكا)، گۇلنافيز ايتمۇحامبەتوۆا، فەرۋزا ەرگەشوۆا (تاەكۆوندو)، گۇلجان يسسانوۆا (دزيۋدو)، نازىم قىزايباي، سايدا حاسەنوۆا، داريعا شاكىموۆا (بوكس) باستاعان حالىقارالىق دودالاردا ايرىقشا كوزگە ءتۇسىپ جۇرگەن ارۋلارىمىزدىڭ بار ەكەنىن ەستەن شىعارۋعا بولمايدى.

ەندەشە، بيىلعى ريو وليمپياداسىندا ءبىر قازاق قىزى وليمپيادانى باعىندىرىپ، قازاق قىزدارىن كۇللى الەمگە تانىتسىن دەپ تىلەيىك.

وسىعان دەيىنگى قازاقستان قورجىنىنا وليمپيادا جۇلدەسىن سىيلاعان ارۋلار:

سيدنەي وليمپياداسى (2000)

ولگا شيشيگينا (جەڭىل اتلەتيكا) - التىن؛

بەيجىڭ وليمپياداسى (2008)

يرينا نەكراسوۆا (اۋىر اتلەتيكا، 63 كەلى)، اننا ۆاجەنينا (اۋىر اتلەتيكا، 75 كەلى) - كۇمىس؛

ەلەنا شالىگينا (ايەلدەر كۇرەس، 63 كەلى)، ماريا گرابوۆەتسكايا (اۋىر اتلەتيكا، 75+ كەلى) - قولا،

لوندون وليمپياداسى (2012)

ولگا رىپاكوۆا (جەڭىل اتلەتيكا)، ءزۇلفيا چينشانلو (اۋىر اتلەتيكا، 53 كەلى)، مايا مانەزا (اۋىر اتلەتيكا، 63 كەلى)، سۆەتلانا پودوبەدوۆا (اۋىر اتلەتيكا، 75 كەلى) - التىن؛

مارينا ۆولنوۆا (ايەلدەر بوكسى، 75 كەلى)، گۇزەل مانيۋروۆا (ايەلدەر كۇرەسى، 72 كەلى) - قولا مەدال.

كۇنسۇلتان وتارباي