عارىشكەر ا. ايىمبەتوۆ ىستامبۇلدا اۋە وپەراتسيالارى بويىنشا سيمپوزيۋمدە ءسوز سويلەدى - فوتو
بۇل تۋرالى تۇركياداعى قازاقستان ەلشىلىگىنىڭ باسپا ءسوز قىزمەتى حابارلادى.
سيمپوزيۋمدى تۇرىكتىڭ اسكەري- اۋە كۇشتەرى ۇيىمداستىردى، ونىڭ بارىسىندا اسكەري- عارىش كۇشتەرىنىڭ مۇمكىندىكتەرى مەن ولاردى قولدانۋ پەرسپەكتيۆالارى تالقىلاندى.
سيمپوزيۋم بيىل 3- رەت وتۋدە. وعان الەمنىڭ 53 ەلىنەن 1000 نان استام ادام قاتىستى. شارا بارىسىندا الەمدىك عارىش سالاسىن دامىتۋدىڭ مۇمكىندىكتەرى مەن پەرسپەكتيۆالارى تالقىلاندى. اسكەري اۋە عارىش كۇشتەرىن، ونىڭ ىشىندە ۇشقىشسىز ۇشاتىن اپپاراتتاردى، ۋلترادىبىستى ۇشاتىن نىساندار، زىمىران جانە سەرىكتىك سالالاردا قولدانىلاتىن ارنايى ەلەكتروندىق جۇيەلەردى بەلسەندى پايدالانۋ اتاپ ءوتىلدى.
ءوز سوزىندە ا. ايىمبەتوۆ عارىشتا بولعان تاجىريبەسىمەن، جاڭالىقتارىمەن ءبولىستى.
«عارىشتان جەرگە قاراساڭ، ەلدەر اراسىنداعى شەكارالار سىزىعى كورىنبەيدى. جەردە حالىقارالىق پروبلەمالار مەن جانجالدى جاعدايلار بەيبىت جولمەن عانا شەشىلگەنىن قالار ەدىم»، - دەدى ول.
ا. ايىمبەتوۆ 2003 -جىلى ىستامبۇلدا ق ر پرەزيدەنتىنىڭ قاتىسۋىمەن اشىلعان اباي اتىنداعى مەكتەپكە باردى. تۇركياداعى قازاق دياسپوراسىنىڭ وكىلدەرى، قوعام قايراتكەرلەرى، وقىتۋشىلار قۇرامى مەن وقۋشىلار عارىشكەرمەن كەزدەسۋگە قاتىستى.
تۇركياداعى قازاق دياسپوراسى وكىلدەرىمەن كەزدەسۋ ۇيىمداستىرىلدى. شاراعا جەرگىلىكتى ساياسي پارتيا، قوعامدىق ۇيىمدار، عىلىمي جانە ىسكەرلىك ورتا وكىلدەرى، قازاقستاندىق ستۋدەنتتەر جانە ەتنيكالىق قازاقتار تۇراتىن زەيتىنبۇرىن اۋدانىنىڭ باسشىلارى قاتىستى.
