اقتوبەلىك تەاتر ديرەكتورى ءبىر قوڭىراۋمەن شەنەۋنىكتەردىڭ زارەسىن الدى
«مينيسترلىك» دەگەن ءسوزدى ەستىگەن اكىمدىك قىزمەتكەرلەرى دۇرلىگىپ جاتىر دەپ حابارلايدى NUR. KZ ءتىلشىسى.
كۇلكى كۇنىندە شەنەۋنىكتەردى الداپ سوققان وقيعانى مادەنيەت قايراتكەرى Facebook الەۋمەتتىك جەلىسىندەگى پاراقشاسىندا ءبولىستى.
- اكىمشىلىكتە جاسايتىن ءبىر قۇرداسىما تەلەفون شالدىم، - دەپ جازادى ديرەكتور.
- الەۋ، بۇل اسەكەڭ با؟
- ءيا، ءيا، نۇرەكە امانبىسىڭ؟
- شۇكىر، نە جاڭالىقتار؟
- بىزدە نە جاڭالىق بولسىن، جوعارعى جاقتان كەلگەن قاعازدارعا كومىلىپ وتىرعان- دەدى ول شارشاڭقىراپ.
- ا، ا، سونداي ءبىر قاعاز بىزگە دە مينيسترلىكتەن كەلىپ تۇر، - دەدىم.
- ول قانداي قاعاز؟ - دەدى قۇرداسىم.
- جىل بويى تەاترعا قويىلىم كورۋگە كەلگەن باسشىلاردىڭ ءتىزىمىن سۇراپ جاتىر.
- مينيسترلىكتەن دەيسىڭ بە؟ ونى قايتەدى ەكەن؟
- تەاترعا كەلمەيتىن باسشىلاردى قارا تىزىمگە ىلىكتىرىپ، سايتتار مەن گازەتتەرگە جاريالايدى ەكەن. سوسىن ولاردى «قازاق ونەرىنىڭ جاۋلارى» - دەپ، جۇمىستان شەتتەتەدى ەكەن.
ول بىردەن شوشىپ كەتتى.
- ويباي، نۇرەكە، تىزىمدە مەن بارمىن با؟
- قارا تىزىمدە مە؟
- جوق، تەاترعا بارعان ادامداردىڭ ىشىندە...
- اسەكە، قايدان بولسىن؟ سەن بىردە-ءبىر قويىلىمعا كەلىپ كورگەن جوقسىڭ عوي، - دەدىم كۇلىپ.
- ا،ا، سولاي ەكەن عوي، - دەدى دە تەلەفوننىڭ تۇتقاسىن قويا سالدى. ءبىراق، ىلە-شالا قايتادان ماعان تەلەفون سوقتى.
- نۇرەكە، بىردەڭە قىلىپ مەنى تىزىمگە قوسا سالشى، كەلەسىدە مىندەتتى تۇردە بارامىن، - دەپ جالىنىپ تۇر.
- قانداي سپەكتالدى تاماشالادى دەپ جازايىن؟
- ءوزىڭ ءبىلشى، وتىنەمىن...
قاراپايىم عانا ازىلمەن ءومىردىڭ شىنايى كورىنىسىن جاساعان مادەنيەت قايراتكەرى وسىلاي تەاترعا جارناما جاساماق بولعانىن ايتادى. ءبىراق، شەنەۋنىكتەرگە بۇل وي جەتەر ەمەس.
ولار تەاتردىڭ تابالدىرىعىن كورمەسە دە باراتىنداردىڭ قاتارىندا جۇرگىسى كەلەدى. وكىنىشتىسى سول، تەاتر ديرەكتورى مۇنداي ادامداردىڭ از ەمەس ەكەنىن ايتىپ كەتكەن. ونى ءازىلدىڭ مىنا جالعاسىنان وقي الاسىز.
- قۇرداسىمدى قاتىردىم دەپ، تۇرسام سالدەن كەيىن، اكىمشىلىكتەن تاعى بىرەۋ تەلەفون شالدى، - دەپ جازادى نۇرلىبەك جۇباتقان.
- نۇرەكە، بۇل مەن عوي تەاترعا بارماعانداردىڭ ءتىزىمىن جاساپ جاتىر دەي ما؟
- ءيا، ءيا- دەدىم.
كۇلكىدەن ءوزىم جارىلىپ تۇرمىن. بۇل اڭگىمە اكىمشىلىكتە وتىرعاندارعا تەز تاراپ كەتسە كەرەك.
- مەنى دە قوسا سالشى، ءبىر كومەگىم تيەر، - دەپ قويادى قيىلىپ.
- جاقسى، ويلانايىن، - دەيمىن مەن.
- سودان نە كەرەك ءبىر ساعاتتىڭ ىشىندە بىرنەشە ادام تەلەفون سوقتى. كۇلكى كۇنىن پايدالانىپ تەاترعا جارناما جاسادىم. اي، ادامدار- اي..،- دەيدى نۇرلىبەك جۇباتقان.
تەاتر ديرەكتورى ءازىلدىڭ بولعان وقيعا ىزىمەن جازىلعانىن راستايدى.
