سىرىن ءالى ەشكىم تاپپاعان جەراستى ءۇيى
شاعىن عانا اۋىلدا ورنالاسقان جەراستى ۇڭگىرى ليەۆون اراكەلياننىڭ ۇيىندە ورنالاسقان. ونىڭ اۆتورى دا ءوزى. ەريەۆانعا جاقىن ورنالاسقان اريندج مەكەنىندە ХХІ عاسىردىڭ ۇڭگىر لابيرينتى بار.
ارحيتەكتورى - لەۆون اراكەليان. اڭىزعا سەنسەك، لەۆون شەبەردىڭ جۇبايى جەرقويما قازىپ بەرۋىن سۇراعان ەكەن. ناتيجەسىندە ءارتۇرلى دەڭگەيدە ورنالاسقان توبەسى تەگىس 7 زالى بار لابيرينت پايدا بولىپتى. اۆتور جەراستى ۇڭگىرىن قازۋعا گەودەزيا قۇرال- جابدىعىنسىز، سىزباسىز كىرىسەدى. دەگەنمەن، جاساعان دۇنيەسىندە ءمۇلت كەتكەن جەرى جوق. قازىر مۇندا كەلۋشىلەردىڭ قاراسى كوپ. تۋف جانە بازالتپەن مانەرلەپ قاپتالعان كوپتەگەن دالىزدەر كورەر كوزدى تاڭ قالدىرادى. ينجەنەرلەر مەن ارحيتەكتورلاردى دا تامساندىرعان وسى كورىنىس. عالىمدار شەبەر 23 جىلدىڭ ىشىندە جالعىز ءوزى قولدا بار قۇرالدارىمەن، ءزىلبالعا، بالعا جانە كەسكىشپەن وسىنشاما جۇمىستى قالاي ىستەگەن دەگەن سۇراققا جاۋاپ تاپپاي كەلەدى.
«ونىڭ قۇرىلىسشى دەگەن ءبىلىمى بولماعان. سونىڭ وزىندە اۋا الماسىپ تۇراتىن جۇيەنى ويلاپ تاپتى. ۇڭگىردىڭ ەڭ تومەن دەگەن جەرىنىڭ وزىندە تازا اۋا بار. مۇنداعى تەمپەراتۋرا جىل بويى 7-10 گرادۋس. مىنە، مىناۋ ۆەنتيلياتسيا شاحتاسى»، - دەيدى ەكسكۋرسيا جەتەكشىسى اشوت لەۆونيان.
بۇل ۇڭگىرگە تۇسكەن تۋريستەر ەرتەگىلەر الەمىنە تاپ بولعانداي كۇي كەشەدى. وندا ءجۇرىپ- تۇراتىن جولداردىڭ بارلىعى سوفيت شامدارىمەن قامتىلعاندىقتان، العان اسەرىڭىز ەسەلەنە تۇسەدى. 21 مەتر تەرەڭدىكتە ۇزىندىعى 150 مەتر بولاتىن ءدالىزدىڭ اسا قاسيەتتى دەپ سانالاتىن نۇكتەسى دە بار.
ۇڭگىردىڭ سوڭىنا دەيىن قازىلماي قالعان تۇستارى دا بار. الايدا، حالىق اراسىنان شىققان ساۋلەتشىنىڭ 13 نەمەرەسى اتاسىنىڭ ءىسىن جالعاستىرا الادى. دەگەنمەن، لەۆون اراكەليان بۇل جەراستى الەمىن نە ءۇشىن جاراتقانىن ەشكىمگە ايتپاي ومىردەن ءوتىپتى.
