وڭتۇستىك قازاقستاندا ەسەك ۇرلىعى ءورشىپ وتىر - تەرىسى مەن قۇلاقتارى اسا قىمبات

شىمكەنت. قازاقپارات - وڭتۇستىك قازاقستاندا جاپپاي ەسەك ۇرلانىپ جاتىر.

ساناۋلى كۇننىڭ ىشىندە تۇركىستانداعى ونداعان اۋىلدان 50 دەن استام جانۋار جوعالعان.

ال ولاردىڭ تەرىسى سىپىرىلىپ، قۇلاقتارى كەسىلگەن ولەكسەلەرى اۋىل ماڭىنان تابىلىپتى. قارا بازاردا ءبىر ەسەكتىڭ تەرىسىنىڭ قۇنى 40 پەن 150 مىڭ تەڭگە اراسىندا ساتىلاتىن كورىنەدى. ال ونىڭ قۇلاعىنان ءتىپتى ەركەكتىڭ قۋاتىن كۇشەيتەتىن ءدارى جاسالادى دەسەدى جۇرت.

- مىنا جەردە بايلانىپ تۇراتىن. قازىعىن سۋىرا الماعان عوي. كەسىپ العان ءجىپتى، الىپ شىققان، - دەيدى ەسەگىنەن ايىرىلعان قاناتبەك جارىلقاسىنوۆ.

ۇرىلار ونىڭ جالعىز ەسەگىن الىپ كەتكەن كەزدە قورادا سيىر مەن قوي دا تۇرعان ەكەن. ءبىراق، ناق سالپاڭقۇلاقتى كوزدەگەن ۇرى- قارى جۇرت ۇيقىعا كەتكەن ساتتە ونى اۋىل ماڭىنداعى سايعا جەتكىزگەن دە قۇلاعىن كەسىپ، تەرىسىن سىپىرىپ العان.

ەندى تۇرعىنداردىڭ ەسەگى قارعا- قۇزعىنمەن ءيت- قۇستىڭ جەمتىگىنە اينالدى.

تۇركىستانعا قاراستى ەسكى ساۋران اۋىلىندا ءبىر ءتۇن ىشىندە 22 ەسەك جوعالىپتى. ۇرىلار ءبارىن اۋىل شەتىنە اكەلىپ سويا بەرگەن.

-  قىزىلوردا وبلىسىنا كەتىپ جاتىر، ەستىپ جاتىرمىز. وزىمدە ەكى ەسەك بار-تۇعىن. ەكەۋىنەن دە ايرىلدىم، - دەيدى ەسكى ساۋران اۋىلىنىڭ تۇرعىنى سارسەنالى سۇلەيمەنوۆ.

جىلقى مىنۋگە جاعدايى جوق جۇرت ەسەكتى ءبىر قويعا ايىرباستاپ مىنىسكە جاراتىپ كەلگەن. قۇنى 30 مىڭ تەڭگەدەن اسپايتىن جانۋاردىڭ تەرىسى وزىنەن قىمبات تۇراتىنىن، ءتىپتى ونىڭ قۇلاعىنان ەركەكتىك قۋاتتى كۇشەيتەتىن ءدارى جاساۋعا بولاتىنىن ەستىپتى.

ەسكى ساۋران اۋىلىنىڭ تۇرعىنى مۇراتحان ساعىندىقوۆتىڭ ايتۋىنشا، ەسەكتىڭ ءاربىر تەرىسىن 40 مىڭنان، 80 مىڭنان. بىرەۋلەر 150 مىڭنان دەپ ايتىپ جاتىر. ويتكەنى تەرىسى مەن قۇلاعى ءدارى ەكەن.

حايۋاندارى جوعالار كۇنى قىزىلوردالىق ءنومىر تاعىپ، قورا جاعالاپ جۇرگەن كولىكتى كورگەن اۋىلدىقتار پوليتسەيلەرگە حابار بەرگەن ەكەن. ءتىپتى، كۇدىكتىلەردى دە انىقتاپ بەرگەن. 5 كۇن وتكەن سوڭ جاڭاقورعاننان كەلگەن 5 ادام ۇستالدى. 23 پەن 49 جاس ارالىعىنداعى كۇدىكتىلەر ازىرشە 10 ەسەكتى ساتقانى تۋرالى مويىنداپتى.

و ق و ءى ءى د باسپا ءسوز حاتشىسى سالتانات قاراكوزوۆانىڭ ايتۋىنشا، جابىرلەنۋشىلەرگە كەلتىرىلگەن زالال مولشەرى جارتى ميلليون تەڭگەگە جۋىق. ولار ۇرلاعان ەسەكتەردىڭ تەرىسىن قالاعا اكەلىپ، ساۋداعا سالعان.

پوليتسەيلەردىڭ ەسەبىنشە، ءار ەسەكتىڭ تەرىسىن ساۋدا نۇكتەلەرى 50 مىڭنان كەم الماپتى. قازىر تەرىنى قابىلداپ العان ورىندار دا تەكسەرىلۋدە. ال، جانۋارلاردىڭ جاپپاي جوعالىپ، تەرىسىز، قۇلاقسىز كۇيدە تابىلىپ جاتقانى تۋرالى اقپار تۇركىستاننان بولەك، تاعى ەكى اۋداننان شىعىپ وتىر، دەپ حابارلايدى ktk.kz.