شىمكەنتتە ءۇي استىنان اتىلىپ شىققان سۋدى توقتاتۋدىڭ امالى تابىلماي وتىر
وسىنداعى ۇيلەردىڭ ءبىرىنىڭ استىنان سۋ شىعىپ، جۇرتتى ابىگەرگە سالعان.
ءبىر تاۋلىك بويى جەرگىلىكتى بيلىك بۇرقىراپ اققان سۋدىڭ كوزىن تاپپاي الەك بولدى. كەشە قالا باسشىلىعى توتەنشە جاعداي قىزمەتكەرلەرىمەن وسى اۋماقتى ارالاپ، احۋالدى زەردەلەپ كوردى.
ءبىر تاۋلىك بويى ابىگەرگە تۇسكەن شاھار باسشىلىعى اقىرى «وڭتۇستىك سۋ شارۋاشىلىعى» مەكەمەسىنىڭ ماماندارىن شاقىردى. وسى سالادا كوپ جىل بويى ەڭبەك ەتكەن ازاماتتاردىڭ ايتۋىنشا، جەر استىنداعى بۇل قۇبىرلار 1970 -جىلدارى 21 كەڭشاردىڭ سۋارمالى جەرىنە تارتىلعان جۇيە ەكەن. كەيىن اتالعان اۋماق جەكە ءۇي سالۋعا بەرىلىپ كەتكەن.
بىلەتىندەردىڭ ايتۋلارىنا قاراعاندا، بۇرىن دەندراري ساياباعىنا، ودان قالسا سامال-3 شاعىناۋدانىنا قاراي تارتىلعان قالاداعى شايىندى سۋدىڭ ءبارى وسى جۇيە ارقىلى شاھار سىرتىنا شىعىپ كەتەتىن بولعان.
كەنەتتەن جەر استىنان شىققان سۋ ءۇش ۇيگە زيانىن تيگىزدى. ءبىر قورانىڭ قابىرعاسى قۇلاپ قالدى. توتەنشە جاعداي قىزمەتكەرلەرى 24 ساعات بويى سۋمەن ارپالىسىپ، اقىرى ونىڭ اعىسىن باياۋلاتتى. وسىدان 16 جىل بۇرىن باسپانا تۇرعىزعان تۇرعىندار مۇندا قۇبىردىڭ وتكەنىنەن بەيمالىم بولىپتى.
بۇگىندە قالا باسشىلىعى ارنايى جۇمىسشى توبىن قۇرىپ، ورىن العان احۋالدىڭ زاردابىن انىقتاۋدا. بۇدان بولەك وزگە كوشەلەردە دە وسىنداي احاۋدىڭ الدىن الىپ، ىستەن شىققان جۇيەلەردى قالپىنا كەلتىرۋگە بارىن سالماق، دەپ حابارلايدى otyrar.kz.
