ءبىلىم سالاسىنداعى مەكەمەلەر مەملەكەتتىك ساتىپ الۋدا وتاندىق وندىرۋشىلەرگە باسىمدىق بەرۋى ءتيىس - الماتى

الماتى. قازاقپارات - بۇگىن الماتىدا مەملەكەتتىك ساتىپ الۋ سالاسىنداعى قازاقستاندىق مازمۇن ماسەلەسى بويىنشا قالالىق كوميسسيانىڭ كەزەكتى وتىرىسى بولىپ ءوتتى.

وعان الماتى قالالىق كاسىپكەرلەر پالاتاسى، قالالىق بيزنەس- قۇرىلىمدار، قالالىق كاسىپكەرلىك جانە يندۋستريالدى- يننوۆاتسيالىق دامۋ باسقارماسى، ءبىلىم باسقارماسى جانە قالا اكىمدىگىنىڭ باسقا دا قۇرىلىمدىق بولىمشەلەرىنىڭ وكىلدەرى قاتىستى.

كۇن تارتىبىندە ءبىلىم بەرۋ مەكەمەلەرىنىڭ مەملەكەتتىك ساتىپ الۋ شاراسىنا وتاندىق تاۋار وندىرۋشىلەردىڭ قاتىسۋ ماسەلەسى تالقىلاندى. بۇل جەردە ءبىلىم بەرۋ مەكەمەلەرىنىڭ جەرگىلىكتى وندىرۋشىلەردى ەلەمەي، شەت ەلدىك وندىرۋشىلەرگە باسىمدىق بەرتىندىگى اشىق ايتىلدى.

«وتاندىق تاۋار وندىرۋشىلەر شىعاراتىن تاۋارلارىنىڭ ساپاسى شەت ەلدىك تاۋارلاردان ەش كەم ەمەس، ال باعاسى ەداۋىر ارزان»، - دەدى قاتىسۋشىلار.

سونىمەن قاتار، وتىرىستا بايقاۋعا وتىنىمدەردى قابىلداماي تاستاۋ جانە ۇزاقمەرزىمدى كەلىسىم- شارتتاردى جاساۋدىڭ تىم قيىنداتىلىپ جىبەرىلگەندىگى دە ايتىلدى.

وتىرىستى قورىتىندىلاي كەلە، الماتى قالاسى اكىمدىگىنىڭ باسشىلىعى اۋداندىق اكىمدىكتەرگە، ءبىلىم باسقارماسىنا جانە بارلىق ۆەدومستۆالىق باعىنىستى ۇيىمدارعا قازاقستاندىق مازمۇننىڭ ۇلەس سالماعىن 80 پايىزعا جەتكىزۋ ماسەلەسىن ءجىتى باقىلاۋعا الۋدى تاپسىردى.

ايتا كەتەلىك، الماتىدا بۇگىنگى تاڭدا 156 بالاباقشا، 186 جالپى ءبىلىم بەرەتىن مەكتەپ جانە 87 تەحنيكالىق جانە كاسىپتىك ءبىلىم بەرۋ مەكەمەلەرى جۇمىس ىستەيدى.

2015 -جىلى جاڭا 18 ءبىلىم بەرۋ نىسانى پايدالانۋعا بەرىلدى.

بۇگىنگى تاڭدا قالامىزدا بيۋدجەتتىك قاراجات ەسەبىنەن جالپى سوماسى 3,7 ميلليارد تەڭگە بولاتىن 4 نىساننىڭ قۇرىلىسى جۇرگىزىلىپ جاتىر. ولاردىڭ ىشىندە جالپى سوماسى 793 ميلليون تەڭگە بولاتىن 2 بالاباقشا مەن جالپى سوماسى 2,9 ميلليارد تەڭگە بولاتىن 2 مەكتەپ بار.

سونىمەن قاتار، بيزنەستىڭ الەۋمەتتىك جاۋاپكەرشىلىگى اياسىندا قالالىق كاسىپكەرلەرمەن الماتى اكىمدىگى اراسىندا جالپى سوماسى 24,2 ميلليارد تەڭگەگە 21 ءبىلىم بەرۋ نىسانىن سالۋ بويىنشا مەموراندۋمدارعا قول قويىلعان.

ال جالپى، الماتى قالاسىندا ءبىلىم بەرۋ نىساندارى قۇرىلىسىنا 27,9 ميلليارد تەڭگە ءبولۋ كوزدەلگەن. دەمەك بۇل، جيھاز، قۇرىلىس، مەتاللۋرگيا جانە باسقا دا سالالار بويىنشا ونىمدەر شىعاراتىن وتاندىق كاسىپورىنداردى تاپسىرىستارمەن قامتاماسىز ەتۋگە مۇمكىندىك بەرەدى.

اۆتور: ايبوتا جاپپاربەرگەن