ءسادۋاقاسوۆا: مەن بۇل ومىردە سەرىگىم ولجاستان ارتىق تازا دا ءتارتىپتى جان كورگەن ەمەسپىن
ۇلكەن ساحناعا قادام باسقانىنا بيىل 20 جىل تولعان ءانشى ءوزىنىڭ ەشكىمگە ۇقسامايتىن دارا بولمىس، ەرەكشە ستيلىمەن وقشاۋلانىپ تۇرادى. ءتىپتى بىرنەشە جىلدا ءبىر عانا بەينەبايانىن شىعارسا دا، ءوزىندىڭ تىڭدارماندارىن جوعالتپايدى.
ءانشى Stan.kz تىلشىسىنە بەرگەن سۇحباتىندا سوڭعى جاڭالىقتارىمەن ءبولىسىپ قانا قويماي، حالىق اۋزىندا جۇرگەن قاۋەسەت سوزدەردىڭ نۇكتەسىن قويدى. قازاق ەستراداسىنىڭ جۇلدىزى ءسادۋاقاسوۆا بۇگىنگى تاڭدا سۇيىكتى جار، اياۋلى انا، يناباتتى كەلىن.
ءانشىنىڭ نازىك داۋسىنا قىزىعىپ قانا قويماي، وعان ەلىكتەيتىن جاسوسپىرىم قىزدار ەلىمىزدە كوپ. وسىعان وراي، انشىدەن سۇلۋلىعىنىڭ سىرىمەن ءبولىسۋدى سۇراعانىمىزدا «وزىمە ەرەكشە كۇتىم جاسايمىن دەپ ايتا المايمىن. جۇرت «ءمادينا پلاستيكالىق وتا جاساتىپتى، مۇرنى مەن كوزىن وزگەرتىپتى» دەپ ايتىپ جاتادى. مۇنىڭ بارلىعىنا ادامنىڭ قيالىنان تۋعان اڭگىمەلەر دەپ قارايمىن. مەن بەتىمە پىشاق ءجۇزى تۇگىلى، تيتتەي ينە ۇشىن تيگىزبەيمىن. سۇلۋلىعىم ءۇشىن، ەڭ بىرىنشىدەن، جاراتقان اللاعا، ەكىنشى وسى دۇنيەگە اكەلگەن اتا-اناما العىس ايتامىن. اكەمنىڭ تۋعان-تۋىسقاندارى تابيعاتتارىنان وتە سۇلۋ بولىپ كەلەدى. ءتىپتى اجەلەرىم جەتپىس جاسقا تولسا دا، سونداي ءبىر اجارلانىپ تۇرادى. ايەل ادام قاي جاستا بولسىن وزىنە كۇتىم جاساۋى ءتيىس. ءوزىم دە كۇندەلىكتى ۇيدەگى جەمىس- جيدەك، كوكونىس، قايماق، ىرىمشىك سىندى ازىق- تۇلىكتەردى ءجيى پايدالانامىن. تەرىمدى ىلعالداندىرۋ ءۇشىن كۇن سايىن بەتىمە قايماق جاعامىن. تۇسىرىلىمگە ءجيى باراتىندىقتان، ول جەردە «بەس توننا» ماكياج جاسايدى. ال مۇندايدان كەيىن مىندەتتى تۇردە ماسكالار جاساۋ كەرەك. مۇنىمەن قاتار، قىتايدان كەلگەن گۇلاي ەسىمدى اپاي جاسايتىن باس ماسساجىنىڭ پايداسى زور. شاش كۇتىمىنە كەلسەك، سۇلۋلىق سالوندارىندا ماسكالار جاساتامىن جانە تەك سالقىن سۋمەن جۋامىن، - دەپ ءانشى تابيعي سۇلۋلىقتى جاقتايتىنىن ايتتى.
ءانشى وسى ۋاقىتقا دەيىن بەرگەن سۇحباتىندا وتاندىق كليپمەيكەرلەردىڭ ءوز وبرازىن وزگەرتكىسى كەلمەيتىنىن ايتىپ، رەنجىگەن-دى. بۇعان جولداسى دا كونبەگەن سوڭ، شەتەلدىك ماماندارعا جۇگىنگەن ەكەن.
«مەنى كورەرمەن دە، اينالامداعى تانىستارىم دا ۇنەمى جادىراپ، كوتەرىڭكى كوڭىل- كۇيمەن جۇرەتىن، اقكوڭىل دە باقىتتى جان رەتىندە تانيدى. كومپوزيتورلار مەن سازگەرلەر ماعان ءان ۇسىنعان كەزدە كوڭىلدى اندەر عانا بەرەدى. وسى ۋاقىتقا دەيىن مۇڭدى ءان ايتىپ كورگەن ەمەسپىن. ايتىپ كورگەننىڭ وزىندە، ۇلكەن دراماتۋريانى قاجەت ەتەتىن بەينەكليپتە باستى ءرولدى باسقا ءبىر اكتريسا سومدايدى، ال مەن تەك ءاندى ايتامىن. ياعني ءوزىمدى باسقا قىرىمنان كورسەتە المايمىن. ءوزىمنىڭ داۋىس تەمبرىم دە بولمىسىما ساي ەكەنىن تۇسىنەمىن. قۋانىشىما وراي، جاڭا بەينەبايانىمدى ءتۇسىرىپ جاتقان ۋكراينالىق رەجيسسەر مەنى باسقا قىرىمنان تانىتۋعا تىرىستى. مامىر نەمەسە ءساۋىر ايىندا جارىق كورەتىن بەينەبايانىمدى ءوزىم دە اسىعا كۇتىپ ءجۇرمىن»، - دەپ كەزەكتى بەينەبايانىندا مۇلدە باسقا، وزىنە جات وبرازدى سومدايتىنىن جەتكىزدى.
بىرنەشە جىلدا ءبىر عانا بەينەبايان ۇسىناتىن ءانشى بۇل جولى تىڭدارماندارىنا قاتارىنان ەكى بەينەبايان سىيلاماق. بەينەباياندارىنىڭ ءبىرى «جۇلدىزىم» اتتى انگە تۇسىرىلمەك. ازىرگە دايىندىق جۇمىستارى جۇرگىزىلىپ جاتىر.
ءوزىن باسقا قىرىنان تانىتقىسى كەلەتىن ءانشى، ونەردە دە، ومىردە دە ءبىر مىنەزىنە ادال ەكەنىن ايتىپ، اعىنان جارىلدى. «حالىقتىڭ الدىندا قانداي بولسام، ۇيدە دە ءدال سوندايمىن. ءالى كۇنگە دەيىن ەركەلەي بەرگىم كەلەدى. ايەل ادامنىڭ ەركەلەۋى جاسىنا بايلانىستى ەمەس ەكەن. اتا- ەنەممەن، ەكى قاينىممەن بىرگە تۇرامىن. شىنىمدى ايتسام، اتا- ەنەسىمەن بىرگە تۇرعىسى كەلمەيتىن كەلىندەرگە اقىل ايتۋدان اۋلاقپىن. وتاۋ قۇرعانىمىزعا، مىنەكي، جاڭادان ەكى جىلدان استى، سوندىقتان ماعان اقىل ايتاتىن ادامدار تابىلىپ جاتسا قۇبا- قۇپ دەيمىن. ءار ادام ءوز الدىنا قايتالانباس تۇلعا بولعاندىقتان، قيىندىقتارىن تۇرلىشە شەشىپ جاتادى. ەڭ باستىسى - ەكى جاستىڭ ءبىر- ءبىرىن شىنايى ءسۇيىپ، ارادا سىيلاستىق قالىپتاستىرا ءبىلۋى. ال تۇسىنىستىك بار جەردە بارلىعى دا بولادى»، - دەيدى ءانشى.
مۇنىمەن قاتار، «مەن بۇل ومىردە سەرىگىم ولجاستان ارتىق تازا دا ءتارتىپتى جان كورگەن ەمەسپىن. ول - وزىنە، ءوزىنىڭ ۇستانىمدارىنا، ىسىنە، وتباسىنا، جارى مەن بالاسىنا ادال جان. ءبىر ساتكە بولسىن قۋلىق جاساۋ تۋرالى ويلانبايدى دا»، - دەپ ءانشى سۇيىكتىسىن ءبىر ماقتاۋدى ۇمىتپادى.
1996 -جىلى العاش رەت كيەلى ساحناعا قادام باسقان ءانشى بيىل 20 جىلدىق مەرەي تويىن اتاپ وتپەك. سول جىلى «جىل جاڭالىعى» نوميناتسياسىن جەڭىپ، قىزىلوردالىق كومپوزيتوردىڭ «كۇت مەنى» اتتى ءانى حيت شەرۋلەردىڭ الدىڭعى قاتارىنان ورىن العان.
«قازىر حالىققا كورىنبەسە دە، ۇلكەن جۇمىستار جۇرگىزىلىپ جاتىر. بەينەباياندارىمدى بىرنەشە جىلدا ءبىر رەت سيرەتىپ شىعاراتىنىم راس. بۇيىرسا، الدا كەلە جاتقان كونسەرتىمە وراي بىرنەشەۋىن قاتار شىعارماقپىن»، - دەيدى ءانشى.
ءانشى الداعى ۋاقىتتا دا ءومىرىن وتباسى مەن شوۋ- بيزنەسكە ارناپ، باسقا سالاعا ات باسىن بۇرعىسى كەلمەيتىنىن ايتتى. ءوزىنىڭ ايتۋىنشا، باسقا سالاعا يكەمى دە جوق.
- وقىرماندار تانىمال ادامداردا بارلىعى جاقسى، ەش ۋايىم- قايعىسى جوق دەپ ويلايدى. مۇمكىن سىزگە دە ومىرىڭىزدە بىرنارسە ۇناماي، كوڭىلىڭىزگە قاياۋ تۇسىرەتىن شىعار؟
- مەن بارلىق ادام سەكىلدى شىندىقتى ۇناتامىن. بارلىق جەردە، بارلىق نارسەدە شىندىق پەن ادالدىق بولسا ەكەن دەيمىن. وتىرىكتى ۇناتپايمىن، ءتىپتى تەز الدانىپ قالامىن. ارينە، الدانعاندى كىم جاقسى كورسىن. بۇدان وزگە جىلاننان قاتتى قورقامىن. كوپشىلىك دەنساۋلىققا پايدالى دەگەنىمەن تەڭىز تاعامدارى سىندى دۇنيەلەردى ۇناتپايتىنىم بار، - دەپ ءانشى ءوزىنىڭ وسى مىنەزىنەن ەش ارىلا الماي جۇرگەنىن ايتتى.
ءانشى كەزەكتى ۇزىلىستەن كەيىن تامارا اسار، نۇرلان ابدۋللين سىندى انشىلەرمەن «ەكى جۇلدىز»، «دوستار» اندەرىنە دۋەت جازىپ ۇلگەرگەن. مۇنىمەن قاتار، الداعى ۋاقىتتى كونسەرتىنە ارناپ تانىمال جانە ونەرگە ەندى قادام باسىپ كەلە جاتقان انشىلەرمەن دۋەت جازباق.
ەستەرىڭىزگە سالا كەتسەك، ءمادينا ءسادۋاقاسوۆادان جولداسىنىڭ بۇرىنعى وتباسى تۋرالى ايتپاۋىن وتىنگەنى تۋرالى جازعان بولاتىنبىز.
