يۋنەسكو- نىڭ تىزىمىنە قازاقستاننىڭ رۋحاني مۇرالارى ەنگىزىلدى

استانا. قازاقپارات - يۋنەسكو- نىڭ بۇكىلالەمدىك مۇرا تىزىمىنە قازاقستاننىڭ 10 تاريحي ەسكەرتكىشى جانە ادامزاتتىڭ ماتەريالدىق ەمەس مادەني مۇراسىنىڭ كورنەكى تىزىمىنە 3 رۋحاني مۇراسى ەنگىزىلگەن.

 بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى اقتوتى رايىمقۇلوۆا ايتتى، دەپ حابارلايدى BNews.kz ءتىلشىسى.

 ياعني، 2003 -جىلى يۋنەسكو- نىڭ بۇكىلالەمدىك مۇرا تىزىمىنە قوجا احمەت ياسساۋي كەسەنەسى، 2004 -جىلى الماتى وبلىسىنداعى تاڭبالى پەتروگليفتەرى ەنگىزىلدى. 2014 -جىلى اتالعان ءتىزىم 8 ەسكەرتكىشپەن تولىقتىرىلدى. ولار -  ۇلى جىبەك جولىنىڭ بويىنداعى اقىرتاس، قۇلان، ورنەك، قوستوبە، اقتوبە، تالعار، قويلىق، قارامەرگەن ارحەولوگيالىق ەسكەرتكىشتەرى.