كابۋلدا قازاقستاننىڭ العاشقى ساۋدا ءۇيى اشىلدى

استانا. قازاقپارات - اۋعانستانمەن ساۋدا- ساتتىق اۋقىمىن كەڭەيتۋ ماقساتىندا كابۋلدا قازاقستاننىڭ العاشقى ساۋدا ءۇيى اشىلدى. ساۋدا ءۇيى قازاقستان سىرتقى ساۋدا پالاتاسى مەن اۋعانستان يسلام رەسپۋبليكاسىنداعى قازاقستان ەلشىلىگىنىڭ كومەگىمەن ىسكە قوسىلىپ وتىر.

 بۇل تۋرالى پالاتانىڭ باسپا ءسوز قىزمەتىنەن حابارلاندى.

اۋعانستان يسلام رەسپۋبليكاسىنداعى قازاقستاننىڭ توتەنشە جانە وكىلەتتى ەلشىسى ءومىرتاي ءبىتىموۆتىڭ ايتۋىنشا، ەكى ەل اراسىندا ساۋدا بايلانىستارىن دامىتۋ ءتۇرلى ساۋدا ورتالىقتارىن اشۋ ارقىلى جاندانا تۇسەدى. بۇل رەتتە كابۋلدە ساۋدا ءۇيىنىڭ اشىلۋى ەكى ەل كاسىپكەرلەرى ءۇشىن تىعىز بايلانىستار ورناتۋعا نەگىز بولماق. «اۋعانستان ۇكىمەتى قازاقستانمەن ساۋدا قاتىناستارىن دامىتۋ ارقىلى ۇلكەن ەكونوميكالىق وسىمگە قول جەتكىزەدى دەپ سەنەمىز. جالپى قازاقستان مەن اۋعانستان اراسىندا كوپجىلدىق ساۋدا قاتىناستارى جولعا قويىلعان. وسىعان بايلانىستى ءبىزدىڭ ەلىمىز ازىق- تۇلىك يمپورتتارى ءۇشىن تاماشا بالاما بولا الادى»، - دەدى ەلشى.

ايتا كەتەرلىگى، وتكەن جىلدار مالىمەتتەرى بويىنشا قازاقستان اۋعانستاننان 3 ميلليون دوللار شاماسىندا تاۋارلار يمپورتتاعان. ال قازاقستاننىڭ اۋعانستانعا ەكسپورتى 333 ميلليون دوللاردى قۇراپ وتىر. ونىڭ ىشىندە ۇن مەن مۇناي ونىمدەرى باسىمدىققا يە.

قازاقستان سىرتقى ساۋدا پالاتاسىنىڭ باسقارما ءتوراعاسى مەيىربەك ءماجىتوۆتىڭ ايتۋىنشا، اۋعانستان استاناسىندا ساۋدا ءۇيىنىڭ اشىلۋى ساۋدا سالاسىنداعى بايلانىستاردى ارتتىرۋعا تاماشا باستاما بولىپ تابىلادى.

 «وسى ارقىلى وتاندىق تاۋار وندىرۋشىلەر وزدەرىنىڭ ونىمدەرىن كابۋلداعى «اۋعانستان ەكسپورت سەنتر» ءىرى كورمە پاۆيلونىنا تەگىن ورنالاستىرا الادى. ال كورمە وكىلدەرى جەرگىلىكتى نارىق بويىنشا قازاقستاندىق تاۋار وندىرۋشىلەرمەن ىسكەرلىك بايلانىسقا دايىن»، - دەيدى م. ءماجىتوۆ.

اۆتور: قانات مامەتقازى ۇلى