دومبىرا مەن قوبىزدىڭ اۋەزدى اۋەنى ەۋروپالىقتاردى تاعى ءبىر تامساندىردى - كەسكىن
ۇلتتىق ونەر ۋنيۆەرسيتەتىنىڭ مۋزىكانتتارى قۇرمانعازىنىڭ كۇيىن، ءبىرجان سالدىڭ شىعارمالارىن ورىنداپ شەتەلدىك قاۋىمدى ءتانتى ەتتى، دەپ حابارلايدى khabar.kz.
موتسارتتىڭ اۋەندەرىن قوبىز بەن دومبىرادا ورىنداعان ونەرپازدار اۆستريالىقتاردى تاڭ-تاماشا قىلدى.
موتسارت، شتراۋس مەن شۋبەرت سەكىلدى ۇلى كومپوزيتورلاردىڭ ەلىنە كەلىپ، ونەر كورسەتۋدىڭ سالماعى ەكى ەسە زور. ويتكەنى كلاسسيكالىق مۋزىكانى تىڭداپ ۇيرەنگەن بۇل كورەرمەندى تاڭ قالدىرۋ وڭاي شارۋا ەمەس. الايدا قازاقستاندىق ارتىستەر ابىرويدى قولدان بەرمەدى. العاشقى مينۋتتان-اق زالدى باۋراپ الدى.
ەۋروپالىقتار ءۇشىن بۇل مۋزىكالىق اسپاپتاردىڭ بارلىعى بەيتانىس. كۇمبىرلەگەن دومبىرا نەمەسە ءۇنى سكريپكاعا ۇقسايتىن قاسيەتتى قوبىز - اۆستريالىقتار ءۇشىن ەكزوتيكا. ۇلتتىق ونەر ۋنيۆەرسيتەتىنىڭ رەپەرتۋارى قازاق مۋزىكاسىنىڭ مارجاندارىنان قۇرىلعان.
«حالىق وركەسترى حالىقتىڭ مۋزىكاسىن وينايدى. الايدا كونسەرت سوڭىندا ءبىز ۇلى كلاسسيكتەردىڭ ءبىر-ەكى ۇزدىك شىعارماسىن قوسىپ، حالىقتىق وركەستردىڭ مۇمكىندىكتەرى شەكسىز ەكەنىن بايقاتۋعا تىرىسامىز. مۇنداي موتسارتتى اۆستريالىقتار بۇرىن-سوڭدى ەستىمەگەن بولار. اۋەننىڭ العاشقى نوتاسىنان-اق زال دۋ ەتە قالدى. كورەرمەن قوشەمەتىنىڭ ارقاسىندا ءبىزدىڭ ونەرپازدار «تۇرىك مارشىن»، يتالياندىق وپەرانى، ءتىپتى نەمىس تىلىندەگى شىعارمانى ءساتتى ورىنداپ شىقتى. قالىڭ قاۋىمنىڭ اسەرى جۇزدەرىنەن-اق بايقالىپ تۇردى»، - دەيدى ق ر حالىق ءارتىسى ايمان مۇساقوجايەۆا
قازاقستاندىق ارتىستەردىڭ ونەرىنە كەشە سلوۆەنيا قول سوقسا، بۇگىن اۆستريا، ال ەرتەڭ سەربيا قارسى الادى. بۇل كونسەرتتەر ناۋرىز مەرەكەسىنە جانە تاۋەلسىزدىكتىڭ 25 جىلدىعىنا ارنالىپ وتىر. تالانتتى مۋزىكانتتاردى الدا تۇركيا مەن يتاليا ساحناسى كۇتەدى.
