عالىمدار جۇرەكتىڭ زاقىمدانعان بولىكتەرىن الماستىراتىن جاماۋ ويلاپ تاپتى
تەلەارنانىڭ مالىمەتىنشە، شەتەلدىك عالىمدار جۇرەككە ارنالعان بيونيكالىق جاماۋ جاساپ شىعارعان. جاڭا قۇرىلعى ءتىرى ۇلپا مەن نانوەلەكترونيكانى بىرىكتىرىپ، دارىگەرلەرگە جۇرەكتىڭ قىزمەتىن سىرتتاي قاداعالاپ وتىرۋعا مۇمكىندىك بەرەدى.
«تەل- اۆيۆتەگى زەرتحانادا عالىمدار جۇرەككە ارنالعان بيونيكالىق جاماۋ ويلاپ تاپتى. بۇل ماتەريال ينفاركت نەمەسە باسقا جۇرەك اۋرۋلارى كەزىندە زاقىمدانعان بولىكتەردى الماستىرۋ ءۇشىن قولدانىلادى، - دەپ حابارلادى تەلەارنا.
تەل- اۆيۆ ۋنيۆەرسيتەتىنىڭ پروفەسسورى تال دۆيردىڭ ايتۋىنشا، ەلەكترونيكامەن بىرىكتىرىلگەن ۇلپانى جاساۋ العاش رەت ءساتتى جۇزەگە استى.
«مۇنى كيبەر- ۇلپا دەپ تە اتاۋعا بولادى. ول ماشينا مەن ءتىرى جاسۋشالاردى بىرىكتىرەدى»، - دەدى ول.
دارىگەرلەردىڭ ايتۋىنشا، وسىنداي جاماۋلار جۇرەكتى الماستىرۋعا بالاما بولا الادى. ولار جاساندى جاسۋشالاردىڭ جۇمىسىنا مونيتورينگ جاساپ، ەلەكتر جاعىنان ىنتالاندىرىپ، دارىلىك زاتتاردى جىبەرۋگە كومەكتەسەدى. سونىمەن قاتار، جاماۋ ناۋقاستىڭ جاعدايى ناشارلاعانىن دارىگەرگە دەر كەزىندە حابارلاي قويادى.
«دارىگەر ناۋقاستىڭ جۇرەك جاعدايىن ءوز كومپيۋتەرى ارقىلى باقىلاي الادى. بۇل ادام سەنگىسىز مۇمكىندىكتەرگە جول اشادى. مۇندا ءتىپتى دارىگەردىڭ دە قاجەتى شامالى، سەبەبى جاماۋ ءىستىڭ ءبارىن ءوزى تىندىرادى»، - دەدى تال دۆير.
ايتا كەتەيىك، بيونيكالىق جاماۋدى ازىرشە كوممەرتسيالىق ماقساتتا پايدالانۋعا بولمايدى. بۇل جاڭاشىلدىق قازىر جانۋارلارعا قولدانىلىپ، سىناقتان ءوتىپ جاتىر. ناتيجەسى جاقىندا بەلگىلى بولادى. سىناق ءساتتى بولسا، ادامدارعا قولدانىلا باستايدى. سودان كەيىن عانا جاپپاي ساتىلىمعا شىعارىلۋى مۇمكىن.
