ەلوردادا «مەرەيلى وتباسى» ۇلتتىق كونكۋرسى وتەدى

استانا. قازاقپارات - بيىل «مەرەيلى وتباسى» ۇلتتىق كونكۋرسى ءتورتىنشى رەت وتكىزىلەدى، وعان ەڭبەك، سپورت، شىعارماشىلىق، ينتەللەكتۋالدىق جانە عىلىم سالالارىندا جوعارى جەتىستىكتەرگە قول جەتكىزگەن وتباسىلار قاتىسا الادى، دەپ حابارلايدى ەلوردانىڭ رەسمي سايتى.

ەرتەڭنەن باستاپ ۇلتتىق كونكۋرستى دايىنداۋ جانە وتكىزۋ بويىنشا ۇيىمداستىرۋ كوميسسياسى قاتىسۋشىلاردان وتىنىمدەردى قابىلداي باستايدى.

«مەرەيلى وتباسى» كونكۋرس 3 كەزەڭمەن وتكىزىلەدى: ءبىرىنشى كەزەڭ - اۋداندىق (قالالىق)؛ ەكىنشى كەزەڭ - وبلىستىق؛ ءۇشىنشى كەزەڭ - رەسپۋبليكالىق.

كونكۋرسقا قاتىسۋعا وتىنىمدەر ءتيىستى قۇجاتتار قوسا تىركەلگەن ارنايى نىسان بويىنشا اۋداندىق اكىمدىكتەردىڭ ىشكى ساياسات بولىمدەرى مەن استانا قالاسىنىڭ ىشكى ساياسات باسقارماسىندا 2016 -جىلعى ءساۋىردىڭ 1 نەن 30 نا دەيىن قابىلدانادى.

ايتا كەتەيىك، وتىنىمدەردى قاراۋ بارىسىندا كوميسسيا وكىلدەرى وتباسى مۇشەلەرىنىڭ جەتىستىكتەرىنىڭ ماڭىزدىلىعى مەن سانىنا، وتباسىلىق داستۇرلەر مەن جادىگەرلەرگە، رۋحاني- ادامگەرشىلىك قۇندىلاقتارعا، ارعى تەكتەرىن بىلۋىنە جانە ت. ب. نازار اۋداراتىن بولادى.

وتكەن جىلى شىعارماشىل جۇگىنىسوۆتار مەن سپورتشى ەلەۋسىنوۆتەر اۋلەتى «مەرەيلى وتباسى» ۇلتتىق كونكۋرسىنىڭ ەلوردالىق كەزەڭىنىڭ جەڭىمپازدارى اتانعان بولاتىن.

تولىق اقپاراتتى 556708, 556701 تەلەفوندارى ارقىلى الۋعا بولادى.