نيۋ-يوركتە پوليتسەي قىزمەتىن اتقاراتىن شىمكەنتتىك جىگىت تانىمال بوكسشى
برۋكليندىكتەر ديماشتى ەشقاشان جەڭىلىپ كورمەگەن جاس بوكسشى رەتىندە تانيدى. ول شىمكەنتتە جۇرگەن كەزىندە باپكەر نۇرعالي سافيۋلليننىڭ قولىندا جاتتىققان.
نيازوۆتىڭ اكەسى برۋكلينگە كوشىپ بارعان جىلدارى قۇرلىسشى بولىپ، اناسى تاۋارلاردى ورايتىن جۇمىستا ىستەگەن. ديماشتىڭ اناسى سالتانات جادرايەۆا تۇنگى ۋاقىتتا مەدبيكەلىكتە وقىعان. 13 جاسار بالا جاڭا ەلدە باسىندا ەكى جىلداي تەك ءتىل ۇيرەنۋمەن اينالىسادى. باستاپقىدا قازاقستاننان بارعان قانداستارىن قانشا ىزدەسە دە تاپپاعان. تەك الىستاۋ شتاتتاردان رەسەيدەن كوشىپ بارعان بالالارمەن ارالاسادى.
نيازوۆتىڭ ءوزى العاشىندا ماماندىق تاڭداۋدا اناسىنىڭ جولىن قۋىپ، ءۇش جىلداي مەدبيكەلىكتە وقىعان. كەيىننەن ديماشتىڭ قابىلەتى ۇناسا كەرەك ونى پوليتسيا قىزمەتكەرىن دايىندايتىن اكادەمياعا شاقىرعان.
ول قازىر بوكسپەن تەك جۇمىسىنان بوساعان ساتتەردە عانا اينالىسادى. 26 جاستاعى قازىرگى امەريكالىق ديماش كاسىبي بوكستاعى توعىزىنشى جەڭىسىنە جاقىندا عانا قول جەتكىزگەن. شارشى الاڭداعى ونىڭ قارسىلاسى جەرگىلىكتى مىقتى بوكسشى دجەيمس لەستەر بولعان. التى راۋندقا جەتكەن كاسىبي بوكستاعى جەكپە-جەك نيازوۆتىڭ جەڭىسىمەن اياقتالعان. ديماشتىڭ سوزىنشە قازىر جەرگىلىكتى حالىقتىڭ اراسىنان ونى قولداۋشىلار سانى ارتقان. سۋرەتكە ءتۇسىپ، قولتاڭبا سۇرايتىندار كوبەيىپتى. سونداي-اق، ولار ديماشتى پوليتسيا فورماسىندا كورگەن كەزدە تاڭ قالاتىندارىن ءجيى ايتادى ەكەن.
«سپورتپەن اينالىسۋعا، جاتتىعۋدى ءجيى جاساۋعا ۋاقىت تاپشىلىعى ءجيى كەدەرگى بولادى»، - دەيدى ديماش.
ديماشتىڭ سوزىنشە نيۋ-يوركتە پوليتسەي قىزىمەتىن اتقارۋ وتە جاۋاپتى ءارى قاۋىپتى. دەگەنمەن ول ءوزىنىڭ كەزەكشىلىگى كەزىندە قارۋىن بىردە ءبىر رەت قولدانىپ كورمەپتى.
«قۇدايعا شۇكىر. ەگەردە كۇش قولدانۋ جاعدايى بولىپ قالسا، بوكسپەن اينالىسقانىمنىڭ كومەگى تيەدى دەگەن سەنىمدەمىن. قارۋدى قولدانباۋعا تىرىسامىن. مىسالى، ءار پوليتسيا قىزمەتكەرى ءبىر مينۋتتان كەيىن وزىنە نە بولارىن بىلمەيدى. وتە قاۋىپتى، قاستاندىق جاسالىنۋى ابدەن مۇمكىن. سەبەبى ءبىز ەرەجەگە باعىنباعان كولىكتى توقتاتۋدان باستاپ، تۇسىنىسپەۋشىلىك بولىپ قالعان وتباسىنا، ارينە مۇلدەم تانىس ەمەس ۇيگە كىرىپ بارۋعا مىندەتتىمىز. وندا ءومىرىمىزدى قاۋىپكە تىگە وتىرىپ، تانىس ەمەس ورتاعا كىرىپ بارامىز. ولاردا قارۋ بار جوعى تاعى بەلگىسىز بولادى»، - دەيدى ديماش نيازوۆ.
