قازاقستان مەن قىرعىزستان شۋ جانە تالاس وزەندەرى بويىنشا سۋ ءبولۋ ماسەلەلەرىن تالقىلادى

تاراز. قازاقپارات - جامبىل وبلىسىنداعى قورداي ەلدى مەكەنىندە، جامبىل وبلىسىنىڭ اكىمى كارىم كوكىرەكبايەۆتىڭ قىرعىزستان ۇكىمەتىنىڭ شۋ وبلىسىنداعى ۋاكىلەتتى وكىلى باقتىبەك قۇدايبەرگەنوۆپەن، تالاس وبلىسىنداعى وكىلى بايىشبەك جۇمانازاروۆپەن جانە ىستىق كول وبلىسىنداعى وكىلى اسحات اكىبايەۆپەن جۇمىس بابىنداعى كەزدەسۋىندە سۋ شارۋاشىلىعىنداعى وزەكتى ماسەلەلەر جانە شەكارالىق وزەندەردىڭ سۋىن ءبولۋ جايلارى تالقىلاندى.

بۇل تۋرالى جامبىل وبلىسى اكىمىنىڭ باسپا ءسوز قىزمەتى حابارلادى.

جامبىل وبلىسىنىڭ باسشىسى ك. كوكىرەكبايەۆ كورشىلەس مەملەكەتتەردىڭ وبلىستارى اراسىندا سۋ رەسۋرستارىن ءبولۋدىڭ ماڭىزدىلىعىن اتاپ ءوتتى.

سۋدىڭ 80 پايىزىن جامبىل وبلىسى باستاۋى قىرعىزستاندا جاتقان وزەندەردەن الادى. ك. كوكىرەكبايەۆ اۋىل شارۋاشىلىعىنا پايدالانىلاتىن سۋ ماسەلەسى جىل سايىن كوتەرىلەتىندىگىن باسا ايتتى. تالاس وزەنىنىڭ سۋىنان جامبىل، بايزاق، تالاس، جانە سارىسۋ اۋداندارىنىڭ 62 مىڭ گەكتار جەرى سۋارىلادى. شۋ وزەنى قورداي مەن مەركە اۋداندارىنىڭ 46 مىڭ گەكتارىن قامتاماسىز ەتەدى.

ەكى ەل اراسىندا ترانسشەكارالىق وزەندەر سۋىن پايدالانۋ جونىندەگى كەلىسىم بار.

ءبىراق قىرعىز تاراپى وسى جىلعا دەيىن سۋ بەرۋدى ۇدايى شەكتەپ كەلدى.

قىرعىز رەسپۋبليكاسىنىڭ وكىلى جامبىل وبلىسىنىڭ باسشىسىن بۇل تۇيتكىلدى ماسەلەنىڭ وڭدى شەشىلەتىندىگىنە سەندىردى.

«بيىلعى جىلى وزەندەردەگى سۋ كولەمى ءتاۋىر. بارلىق ماسەلەلەر شەشىلەدى. سۋ بارىنە: سىزدەرگە دە، بىزگە دە جەتەدى»، - دەدى قىرعىز رەسپۋبليكاسى ۇكىمەتىنىڭ تالاس وبلىسىنداعى وكىلى ب. جۇمانازاروۆ.