قازاق ديزاينەرى بالنۇر ماسكەۋدى مويىنداتتى
وتكەن جىلى كۇزدە ماسكەۋدەگى رەسەي سىرتقى ىستەر مينيسترلىگىنىڭ ديپلوماتيالىق اكادەمياسىندا ەۋرازيالىق جۇلدەنىڭ «ديزاين» نوميناتسياسى بويىنشا التىن لاۋرەاتى اتانعان اسانوۆا بار بولعانى ءبىر ايدان كەيىن ماسكەۋلىكتەردى تاعى دا ءتانتى ەتكەن بولاتىن.
جىل سايىن وتكىزىلەتىن ماسكەۋ ءسان اپتالىعى - الەمدەگى ەڭ بەدەلدى پاريجدىك، ميلاندىق، نيۋ-يوركتىك، لوندوندىق بەستىكتىڭ ءبىرى بولىپ تابىلادى. اسانوۆا بۇل اپتالىققا 2003-جىلدان بەرى قاتىسىپ كەلەدى جانە كاسىپقويلىق تۇرعىدا باسەكەلەستەرىن مويىنداتۋعا كوشتى.
ديزاينەر رەتىندە ابدەن كەمەلىنە كەلگەن اسانوۆا مودا الەمىن تاڭعالدىرامىن دەپ ەرسى ەكسپەريمەنتتەرگە بارماي-اق، جەكسەنبى، 27- ناۋرىزدا ماسكەۋدە وتكەن حالىقارالىق ءسان اپتالىعىندا «حرۋس تالنىي» پوديۋمىندا ارىپتەستەرىن تاعى ءبىر رەت مويىنداتتى.
قازىردىڭ وزىندە مودا قۋعان ماسكەۋلىكتەرگە تانىمال بولىپ ۇلگەرگەن قازاق ديزاينەرىن قولداۋعا سونداعى دوستارى جانە رەسەي ارتيستەرى مەن رەسەيلىك بلوگەرلەر كەلگەن. ەگەر بيىلعى ماسكەۋدەگى سان اپتالىعىن ناسيحاتتاۋعا 3 مىڭنان استام شەتەلدىك جىلتىر جۋرنالدار، حالىقارالىق تەلەارنالار تىركەلگەنىن ەسكەرسەك، وندا وقيعانىڭ ماڭىزدىلىعى ارتا تۇسپەك.
اسا بەدەلدى ءسان اپتالىعىنا بۇل جولى اسانوۆا «كۇز-قىس- 2016-2017» كيىم ۇلگىلەرىن اپارعان. قازاق قىزىنىڭ بارىنشا كرەاتيۆتى كوللەكتسياسى - توقىما كيىمدەرگە تۇسكەن سان الۋان كەستەلەرىمەن كەلۋشىلەردىڭ كوزىن ارباپ، باعاسىنا قاراماي، جاڭا كوللەكتسيانى ساتىپ الۋعا ۇمتىلعان ادامدار كوپتەپ تابىلىپتى. بيىل بالنۇر ءبىرىنشى رەت تريكوتاجدىق كيىمدەرمەن جۇمىس ىستەپ، ءسان الەمىنە سۇيرەدى.
وسى ارادا بالنۇردىڭ ءسان ۇلگىلەرى وزىندىك سيپاتتان اجىرامايتىنىن، بۇلجىمايتىن تۇجىرىمدى العا سۇيرەيتىن تاماشا ءستيلى بار ەكەندىگىن اتاعان ءجون. ار ءتۇرلى جىپتەردەن توقىلعان كيىمدەرگە تۇسكەن ورنەكتەر مەن كوركەم كەستەلەر، جىبەك ارالاسقان ارابەسكالىق سيپاتتار ماسكەۋدى تاعى دا مويىنداتتى. قازاقستاندىق fashion-يندۋستريانىڭ باستاۋىندا تۇرعان بالنۇر ەلىمىزدىڭ مەملەكەتتىك بايراعىنىڭ ەتالونى مەن ق ر تۇڭعىش پرەزيدەنتىنىڭ شتاندارتىن دايىنداعانىن ۇدايى ماقتان تۇتادى.
