ۇلتتىق ناقىشتاعى كيىم- كەشەكتەرگە سۇرانىس ارتقان

استانا. قازاقپارات -  ۇلتتىق كيىم ساننەن قالعان جوق. بۇل - بەلگىلى سانگەردىڭ پىكىرى. ويتكەنى قازاقستاندىقتار اراسىندا قازىر ويۋ- ورنەك سالىنعان كيىم- كەشەككە، اشەكەي بۇيىمدارعا سۇرانىس ارتقان. ۇكىلى كامشات، بۇرمەلى كويلەكتىڭ ۋاقىتى وتكەن جوق. جىل وتكەن سايىن ۇلتتىق كيىم تۇرلەنىپ، كوپشىلىك ۇستىنەن تاستاماي كيەتىن ۇلگىگە اينالىپ كەلەدى. اسىرەسە، ارنايى تاپسىرىسپەن تىگىلگەن تۋىندىنى كەلەسى ادامنىڭ ۇستىنەن كورمەيسىز.

باتىستا ناۋرىز مەيرامىنا تۇرعىندار ەرەكشە دايىندالادى ەكەن. قامزول، بەشپەت، شاپان، بورىك تىكتىرەدى. مۇنداعى تىگىنشىلەردىڭ ايتۋىنشا، قازاقى ويۋ- ورنەك تۇسكەن كيىمدى جۇمىسقا دا كيۋ سانگە اينالعان.

نۇرجامال قوسقۇلوۆا، ءسان ءۇيىنىڭ وكىلى:

 - بۇعان دەيىن ۇلتتىق كيىم تەك توي- تومالاققا، مەرەكەلىك شارالاردا كيىلسە، قازىر ادامدار كۇندە كيۋگە تىرىسادى. سول ءۇشىن ءبىز جىلىنا ەكى رەت، كوكتەم- جاز، كۇز- قىس توپتاماسىن شىعارامىز. تاپسىرىس كوبەيگەندىكتەن، ايىنا 200-دەن استام كيىم- كەشەك، اشەكەي بۇيىمدارىن دايىندايمىز.

 استاناداعى شاعىن تىگىن سەح اسكەري جانە ارناۋلى جۇمىس كيىمدەرىن تىگىپ كەلگەن. ۇجىم بۇگىندە جەكە ادامداردىڭ تاپسىرىسىن قابىلدايدى. «سوڭعى ەكى جىلدا ۇلتتىق كيىمگە سۇرانىس وسكەندىكتەن، وسى سالانى يگەرە باستادىق»، - دەيدى سەحتىڭ ديزاينەرى لاۋرا جولامانوۆا. كوزدىڭ جاۋىن الاتىن بۇيىمدار پلاستيكتەن جاسالعان. ءبىر- ءبىرىن قايتالامايتىن ەكسكليۋزيۆ اشەكەيلەر دەر ەدىك. شەبەردىڭ دە ماقساتى - قايتالانباس تۋىندى جاساۋ. كاۋچۋكتى قولدان وڭدەگەندىكتەن، اعاشتى ءيىپ، جونىپ شىعارعان بۇيىمداي كورىنەدى. سالماعى دا جەڭىل. تالايدى تامساندىرعان سىرعا، القا، بەلدىك، بىلەزىككە ازىرشە تەك الەۋمەتتىك جەلى ارقالى عانا تاپسىرىس بەرۋگە بولدى ەكەن.

ماحاببات كارىمجانوۆا، ماركانى دامىتۋ بويىنشا ديرەكتورى:

 - ەلىمىزدە مۇنداي تەحنيكامەن جۇمىس ىستەيتىن ەشكىم جوق. برەندتىڭ نەگىزىن قالاۋشى رافاەل ەسەنبايەۆ 4-5 جىل بويى شەبەرلىگىن شىڭداپ كەلەدى. ءار بۇيىم، ءبىرىنشى ءتيىستى جابدىقتىڭ كومەگىمەن قالىپقا قۇيىلادى. سودان سوڭ ونى قولمەن وڭدەيدى. ناۋرىز قارساڭىندا تاپسىرىستىڭ ەكى ەسە وسەتىنى بار. «ينستاگرام» جەلىسى ارقىلى رەسەي، قىتاي، ءتىپتى دۋبايدان حابارلاسىپ، تاپسىرىس بەرىپ جاتىر. ولاردىڭ بارلىعى - سول ەلدەردە جۇمىس ىستەپ نەمەسە ءبىلىم الىپ جۇرگەن قازاقستاندىقتار. ناۋرىزعا دەپ بۇيىمداردى ارنايى جاساتىپ جاتىر.

 بۇل بۇيىمدار - وتاندىق برەندكە اينالعان ۇجىمنىڭ تۋىندىلارى. جالت- جۇلت ەتكەن اشەكەيلەر كوزدىڭ جاۋىن الادى. مۇندا دا بارلىعى قولدان جاسالعان. تالعامعا قاراي تاڭداي بەرىڭىز. اعاشتان، كيىزدەن، مەلحيوردان سوعىلعاندارى بار. تابيعي تاستارمەن ءتىزىپ جاساعانىن دا كورەسىز. باعاسى دا قولجەتىمدى دەيدى ساتۋشىلار. كاسىپورىن ماماندارىنىڭ ايتۋىنشا، ۇلتتىق ناقىشتاعى بۇيىمدارعا سۇرانىس وتە كوپ.

 ايگەرىم سماعۇلوۆا، كاسىپورىننىڭ استاناداعى وكىلى:

- قازىر ۇلتتىق ويۋ- ورنەككە ەرەكشە قىزىعاتىن جاقسى ءۇردىس پايدا بولدى. ماسەلەن، ءبىزدىڭ سوڭعى توپتامامىز ناۋرىز مەيرامىنا قارسى ارنايى شىعارىلدى. تولىعىمەن ۇلتتىق ناقىشتا. كەز كەلگەن كيىمىڭىزگە ۇيلەسەتىندەي ەتىپ، تاڭداپ الۋىڭىزعا بولادى.

 مامانداردىڭ ايتۋىنشا، ۇلتتىق ناقىشتاعى كيىم- كەشەك پەن اشەكەي بۇيىمدارعا سوڭعى ەكى- ءۇش جىلدا سۇرانىس ارتقان. وعان سەبەپ تاريحقا، سالت- داستۇرگە وسكەلەڭ ۇرپاقتىڭ بەت بۇرۋى ەكەن. وسىلايشا، ورنەگى بار كيىمدى كيۋ سانگە اينالعان.

www.24.kz