الماتىدا «جاڭعاق تال» فيلمىنىڭ پرەسس- كورسەتىلىمى بولدى - فوتو
فيلمدە قاراپايىم وتباسىلار اراسىنداعى قارىم- قاتىناستار باياندالادى. بۇل تۋىندى وڭتۇستىك قازاقستان وبلىسىنداعى لەڭگىر قالاسى مەن ونىڭ توڭىرەگىندە تۇسىرىلگەن. ونداعى رولدەردى جەرگىلىكتى تەاتر اكتەرلارى ورىنداعان. ولاردىڭ ىشىندە «شانشار» تەاترىنىڭ ارتيستەرى دە بار. ءتۇسىرۋ توبىنىڭ ايتۋىنشا، بۇل ايماق بەكەرگە تاڭداپ الىنباعان. ويتكەنى، قازاقستاندا جاڭعاق اعاشتارىنىڭ وتانى - وسى لەڭگىر ايماعى ەكەن. سونداي- اق، وسى ءوڭىردىڭ تابيعاتى دا ءتۇسىرۋ توبىنا قاتتى ۇناعان.
«مەن بالا كەزىمدە ءبىر ادامنىڭ جاڭعاق اعاشىن تاياقپەن ۇرعىلاپ جاتقانىنىڭ كۋاسى بولدىم. سويتسەم، ول وسىلايشا گرەك جاڭعاعىن ءتۇسىرىپ جاتىر ەكەن. بۇل كورىنىس سانامدا جاتتالىپ قالدى. كەيىن ول، وسى فيلمنىڭ نەگىزگى ارقاۋىنا اينالدى»، - دەدى رەجيسسەر ەرلان نۇرمۇحامبەتوۆ.
سونىمەن قاتار، ول اكتەرلار قۇرامىمەن دە تانىستىردى.
«الماتىدان مەن تەك باستى ءرولدى سومداۋشى اكتەر - رۇستەم جانامانوۆتى عانا الدىم. قالعاندارىن سول جاقتا جينادىق. تۇسىرۋگە ءبىر اي ۋاقىت قالعاندا سول جاققا بارىپ، اكتەرلاردى تاڭداۋعا كىرىستىك. الايدا، ەڭ باستى ايەل رولىنە اكتريسانى تابۋ قيىننىڭ قيىنى بولدى. بالنۇر اسىلدى ءتۇسىرۋ جۇمىستارى باستالاردىڭ الدىندا عانا تاپتىق»، - دەدى رەجيسسەر.
فيلمدى ءتۇسىرۋدى رەجيسسەر بۇدان 10 جىلدىڭ الدىندا ويلاستىرىپ، سودان بەرى ىشتەي پىسىقتاپ جۇرگەن ەكەن.
ەستەرىڭىزگە سالا كەتەلىك، «جاڭعاق تال» فيلمى 2015 - جىلى قازان ايىندا وڭتۇستىك كورەيادا وتكەن 20- پۋسان حالىقارالىق كينوفەستيۆالىندە «جاڭا باعىت» سەكسياسىنىڭ باس جۇلدەسىنە يە بولعان. سونداي- اق، XXXI- ۆارشاۆالىق حالىقارالىق كينوفەستيۆالدە «ەركىن رۋح» جاڭاشىل كينو بايقاۋىنا قاتىستى.
بۇدان باسقا، «جاڭعاق تال» فيلمى بيىلعى جىلدىڭ باسىندا فرانسيانىڭ ۆەزۋل قالاسىندا وتكەن 22- ازيا كينوسىنىڭ حالىقارالىق كينوفەستيۆالىنىڭ نەگىزگى بايقاۋىنا قاتىسىپ، بىردەن ەكى جۇلدەنى - حالىقارالىق ءادىلقازىلاردىڭ ارنايى جۇلدەسىن («كۇردەلى ەكونوميكالىق جانە ساياسي احۋالعا قاراماستان كۇلدىرە بىلگەندىگى ءۇشىن» ) جانە كينوسىنشىلاردىڭ ارنايى جۇلدەسىن («اۋىل ءومىرىنىڭ شىنايى جانە باتىل بەينەسى ءۇشىن» ) الدى.
قازاقستاندا فيلم ۇلكەن پروكاتقا ەرتەڭ - 31 - ناۋرىزدا شىعارىلادى.
