سمارتفون ۇستاۋعا قاتىستى تىيىمدى بۇزعان قىزمەتكەرلەرگە قانداي جازا قولدانىلاتىنىن ايتۋ قيىن - د. نازاربايەۆا

استانا. قازاقپارات - مەملەكەتتىك قۇپياعا جانە قىزمەتتىك اقپاراتتارعا رۇقساتى بار بارلىق مەملەكەتتىك قىزمەتكەرلەر سمارتفون ۇستاۋعا قاتىستى تىيىمعا جاتقىزىلادى.

 بۇل تۋرالى بۇگىن استانادا ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە جاڭعىرتۋ جونىندەگى ۇلتتىق كوميسسيانىڭ باسپا ءسوز ءماسليحاتىندا ق ر پرەمەر- ءمينيسترىنىڭ ورىنباسارى داريعا نازاربايەۆا ءمالىم ەتتى.

«مەنىڭشە، ەشكىم بۇل تىيىمنان تىس قالا المايدى. مەملەكەتتىك قۇپيا جانە قىزمەتتىك اقپاراتتارمەن جۇمىس ىستەيتىن بارلىق مەملەكەتتىك قىزمەتكەرلەرگە سمارتفون ۇستاۋعا تىيىم سالىنادى. وعان باعىنباعان قىزمەتكەرلەرگە قانداي جازا بولاتىنىن ايتۋ قيىن. ىشكى ءتارتىپ دەگەن بار، مەنىڭشە ونى بارلىعى تۇسىنەدى»، - دەپ اتاپ ءوتتى د. نازاربايەۆا.

ق ر پرەزيدەنتى اكىمشىلىگى جەتەكشىسىنىڭ ورىنباسارى مارات بەكەتايەۆ ورتالىق كوممۋنيكاتسيالار قىزمەتىندە ءوتىپ جاتقان جاڭعىرتۋ جونىندەگى ۇلتتىق كوميسسيا مۇشەلەرىنىڭ باسپا ءسوز ءماسليحاتىندا جۋرناليستەردىڭ سۇراعىنا جاۋاپ بەرە كەلە، مەملەكەتتىك قىزمەتكەرلەر اراسىنان جەرگىلىكتى پوليتسيا قىزمەتكەرلەرىنە سمارتفون ۇستاۋعا رۇقسات ەتىلەتىنىن ايتتى.

 ال، مەملەكەتتىك قىزمەت ىستەرى جونىندەگى مينيستر تالعات دوناقوۆتىڭ ايتۋىنشا، جۇمىس ورنىندا سمارتفون پايدالانعان وزگە مەملەكەتتىك قىزمەتكەرلەر ءتيىستى زاڭناما بويىنشا تارتىپتىك جازاعا تارتىلادى. م. بەكەتايەۆ حابارلاعانداي، مەملەكەتتىك قىزمەتكەرلەر اراسىندا جەرگىلىكتى پوليتسيا عانا سمارتفون ۇستاپ، ازاماتتاردان «WhatsApp» ارقىلى شاعىم قابىلدايدى. 

«جەرگىلىكتى پوليتسيا قىزمەتىنە كەلسەك، ولارعا (جەرگىلىكتى پوليتسياعا) «WhatsApp» ارقىلى حابارلامالار الۋعا مۇمكىندىك بەرىلەدى. جالپى، سمارتفون ۇستاۋعا تىيىم سالۋ تۋرالى ەرەجەنى دۇرىستاپ وقىساق، ەرەجە بويىنشا قۇپيا قۇجاتتار بار مەكەمەلەردىڭ قىزمەتكەرلەرى تۋرالى ايتىلعان. ال، ۋچاسكەلىك پوليتسيانىڭ جۇمىس ورنى اۋدانداردىڭ اۋماعىن قامتىيدى، سوندىقتان، بايلانىس ءۇشىن وعان سمارتفون كەرەك»، - دەدى م. بەكەتايەۆ.

اۆتور: كەنجەكەي توقتامۇرات قىزى