قىتايدىڭ ەڭ باي جازۋشىلارى... كىمدەر؟
بيىل 10 رەت ساراپتالعان رەيتينگتىڭ كوشىن جازۋشى جياڭ نان باستاپ تۇر. ول ءبىر جىل ىشىندە 320 ميلليون يۋان (مولشەرمەن 50 ميلليون دوللار) قالاماقىعا يە بولعان.
بۇعان دەيىن وزگەلەرگە تانىمالدىعى مەن كىتاپتارىنىڭ ساتىلىمى جاعىنان دەس بەرمەگەن حان حان، گو جيميڭ قاتارلى جازۋشىلار الدىڭعى 20 لىقتىڭ سوڭىنا تۇسكەن. جازۋشى گو بيىلعى رەيتينگتە 20-ورىندا تۇر.
بۇكىل قىتاي جۇرتىن تاڭعالدىرعان ءبىر جايت، ۇيعىر ۇلتىنىڭ وكىلى، جاس جازۋشى نۇرالي ابىلەزدىڭ توپ-20 دان كەيىنگى ساتىعا جايعاسۋى بولىپ وتىر. ول «ءبىر جىلىڭىزداعى 8760 ساعات» دەگەن كىتابى ارقىلى ميلليارد قىتايعا تانىمال بولدى. ونىڭ وسى كىتابى قىتاي تىلىنە اۋدارىلىپ، 6 اي ىشىندە 500 مىڭ داناسى ساتىلىپ كەتكەن. سول ارقىلى ول 5 ميلليون 900 مىڭ يۋان قالاماقى الىپتى (1 ميلليون دوللارعا جۋىق). جازۋشىنىڭ بۇل كىتابىنا وقىرماندار جوعارى باعا بەرىپ، قىزىعۋشىلىق تانىتقان سوڭ بيىل جىل باسىندا جاڭا نۇسقاسىن قايتا شىعارىپ ۇلگەرىپتى.
جياڭ نان
قىتايدىڭ نوبەل سىيلىعىن العان جازۋشىسى مو يان قازىر الەمدەگى ەڭ باي جازۋشىلاردىڭ ءبىرى. ءبىراق قىتايدىڭ ءوز ىشىندە ىقپالى ودان دا زور جازۋشىلار كوبەيگەن. بۇعان مو ياننىڭ نوبەل سىيلىعىن الۋى دا ءوز اسەرىن تيگىزگەن بولۋى مۇمكىن. الەمدىك ادەبيەت زەرتتەۋشىلەرى سوڭعى جىلدارى قىتاي وقىرماندارىنىڭ ادەبيەتكە قىزىعۋشىلىعى كۇرت ارتىپ وتىرعانىن، قىتاي جازۋشىلارىنىڭ دا ارىنى ۇلعايىپ، مۇلدەم جاڭا بيىككە كوتەرىلگەنىن ءسوز ەتە باستادى. ءتىپتى، الەمدىك ادەبي ءدۇمپۋ ازياعا اۋعانىن جارىسا جازىپ ءجۇر.
نۇرءالي ابىلەز
ايتپاقشى، قىتايداعى ۇيعىر ادەبيەتىنىڭ الەمدىك ارەنادا وزىندىك ورنى بار دەۋگە بولادى. بۇگىندەرى ۇيعىردىڭ اقىن-جازۋشىلارى قىتايدى مويىنداتىپ قانا قويماي، الەمنىڭ تۇكپىر-تۇكپىرىنە سامعاپ كەتكەن. ەۋروپا، ا ق ش، كانادا، جاپونيا، سينگاپۋر، تۇركيا سەكىلدى ەلدەردە ونداعان ۇيعىر قالامگەرلەرى وزدەرىنىڭ كىتاپتارىن شىعارىپ، ءتۇرلى سىيلىقتارعا يە بولىپ ءجۇر. ولاردىڭ ىشىندە نوبەل سىيلىعىنان ۇمىتكەرلەرى دە جوق ەمەس.
dalanews.kz
