09:11, 30 - ناۋرىز 2016 | GMT +5
وق جاراقاتىمەن جاتقان ناۋقاستىڭ سۋرەتىن جەلى ارقىلى تاراتىپ جىبەرگەن مەيىربيكە جۇمىستان قۋىلدى
استانا. قازاقپارات - رەسەيدىڭ امۋر وبلىسىندا اۋرۋحانادا وق جاراقاتىمەن جاتقان ناۋقاستى زاڭسىز تۇردە سۋرەتكە ءتۇسىرىپ، فوتونى WhatsApp ارقىلى تاراتقان مەيىربيكە قىزمەتىنەن بوساتىلدى، دەپ حابارلايدى ايماقتىق پروكۋراتۋراعا سىلتەمەمەن ريا نوۆوستي.
«2016 -جىلدىڭ 14 -اقپانىنا قاراعان ءتۇنى اۋرۋحانانىڭ قابىلداۋ بولىمىنە وق جاراقاتىن العان جەرگىلىكتى تۇرعىن جەتكىزىلگەنى انىقتالدى. وعان مەديتسينالىق كومەك كورسەتۋ كەزىندە حيرۋرگيا ءبولىمىنىڭ مەيىربيكەسى ناۋقاستىڭ كەلىسىمىنسىز ونى سۋرەتكە ءتۇسىرىپ العان. ودان كەيىن سۋرەتتى WhatsApp ارقىلى تانىسىنا جىبەرگەن، ءوز كەزەگىندە تانىسى بۇل سۋرەتتى عالامتوردا جاريالاعان. وسىلايشا ناۋقاستىڭ سۋرەتى تاراپ كەتكەن»، - دەلىنگەن حابارلامادا.
ر ف زاڭناماسىنا سايكەس، ازاماتتىڭ مەديتسينالىق قىزمەتكە جۇگىنۋى، وعان مەديتسينالىق كومەك كورسەتۋ، دەنساۋلىق جاعدايى جانە تاعى باسقالارى دارىگەرلىك قۇپيا بولىپ سانالادى. ءتارتىپ بۇزعان ۋتكينا. ا. ل. ەسىمدى مەيىربيكە جۇمىستان شىعارىلدى.
