بەلگيا بيلىگى بريۋسسەلدە بولعان جارىلىستان قازا بولعاندار سانى دۇرىس كورسەتىلمەگەنىن مالىمدەدى

استانا. قازاقپارات - بەلگيا بيلىگى بريۋسسەلدە بولعان جارىلىستان قازا تاپقاندار سانى دۇرىس كورسەتىلمەگەنىن مالىمدەدى.

ولاردىڭ دەرەگى بويىنشا، وتكەن اپتادا حابارلانعانداي اجال قۇشقانداردىڭ سانى 35 ەمەس، 32 ادام.

بۇلاي بولۋىنا باستى سەبەپ مىناۋ: ەكى ەلدە ازاماتتىعى بار ءۇش ازامات قايتىس بولعانداردىڭ قاتارىنا ەكى رەت ەنگىزىلگەن. ال جاراقات العانداردىڭ سانى بۇرىنعى قالپى - 250 ادام شاماسىندا قالىپ وتىر.

ايتا كەتەيىك، وقيعا بريۋسسەلدە 22 -ناۋرىز كۇنى تاڭەرتەڭ بولعان ەدى. ونى ءۇش جانكەشتى جۇزەگە اسىرعان. العاشقى ەكى جارىلعىش اۋەجايدا ىسكە قوسىلعان. ال ءۇشىنشىسى قالا ورتالىعىندا، مەترو ستانساسىندا جارىلعان. بەلگيا بيلىگى بۇعان «لاڭكەستىك» دەگەن باعا بەرگەن ەدى.

قاستاندىق شابۋىلىن «ي م» ءوز موينىنا العان، دەپ جازادى bbc.