رەيحستاگقا اتىن جازىپ قالدىرعان مايدانگەر شىمكەنتتە تۇرادى - فوتو
ەلىن جاۋدان ازات ەتىپ، تىنىشتىعىن كۇزەتۋدە 7 جىلىن سارپ ەتكەن ارداگەردى ەڭبەكشى اۋدانىنىڭ اكىمى عالىمجان ءىلياسوۆ ارنايى قۇتتىقتاي بارىپ، تارتۋ-تارالعى جاسادى.
بەرليندى جاۋدان ازات ەتۋگە اتسالىسىپ، رەيحستاگقا ءوز ەسىمىن جازىپ قالدىرعان سوعىس ارداگەرى قوناقتارىن ءوزى كۇتىپ الدى. عاسىرعا جۋىق عۇمىر كەشسە دە، ءالى تىڭ. ءجۇرىسى شيراقى. ويىن دا انىق جەتكىزەدى. ءوزىن مەرەيتويىمەن قۇتتىقتاپ كەلگەن توپقا قاتتى قۋانىپ قالدى، دەپ حابارلايدى otyrar.kz.
وتان ءۇشىن وت كەشىپ، جەڭىستى جاقىنداتقان باتىردىڭ ەستەلىكتەرىن تىڭداۋعا وسى اۋماقتان سىننان وتكەن دەپۋتات جانە ارداگەرلەر كەڭەسىنىڭ ءتوراعاسى دا كەلدى. مايدانگەردىڭ ايتقان ەستەلىكتەرىن تىڭداپ، سوعىستان كەيىنگى جىلدارى ءوڭىردىڭ وركەندەۋى جولىندا سىڭىرگەن ەڭبەگى ولشەۋسىز ەكەنىن ايتقان ولار، وزدەرىنىڭ، وسكەلەڭ ۇرپاقتىڭ تىلەگىن جەتكىزدى.
1943 -جىلى اسكەرگە شاقىرىلعان الەكسەي ۆورونكين بىردەن حۆالينسك قالاسىنا №7 وقۋ اۆتوپولكىنە جىبەرىلەدى. 1944 -جىلى №396 جەكە جاياۋ ارتيللەريالىق پولكىنىڭ قۇرامىندا مايدان شەبىن بۇزۋعا قاتىسادى. مارشال جۋكوۆتىڭ باسقارۋىمەن بەلورۋسيا مايدانىندا بولعانىن ەسكە الدى قاريا. ۆارشاۆاداعى بوگەتتەردى بۇزىپ ءوتىپ، بەرلينمەن شەكارالاس ودەر قالاسىن جاۋدان ازات ەتكەن كۇندەرى ۇمىتىلماق ەمەس.
«بۇل ءبىر قىرعىن سوعىس بولدى. قورعانىس مىقتى ەدى. ارتيللەريالىق كۇش تە وسال ەمەس. اسا كوپ قيىنشىلىقپەن شەپتى بۇزىپ، بەرلينگە قاراي جىلجىدىق. نەمىستەر سوڭىنا دەيىن شايقاستى. ءبىز دە بەرىسپەدىك. ىشەر تاماق، كيەر كيىم بولمادى. جالعىز شينەلمەن سوعىسقان ساتتەر بولدى. ءسويتىپ ءجۇرىپ، 2 -مامىر كۇنى، 1945 -جىلى جاۋدى تىزە بۇكتىردىك. جاۋىنگەرلەردىڭ بارلىعى رەيحستاگقا لاپ بەردى. مەن دە تەك العا جىلجىپ، «مۇندا شىمكەنتتىك ۆورونكين بولعان» دەپ جازۋ قالدىردىم ، دەپ ەسكە الادى ۇ و س ارداگەرى الەكسەي ۆورونكين.
سول جىلى 9 -مامىردا اتاپ وتكەن جەڭىس كۇنىنىڭ دە ءاربىر ءساتى قارت جاۋىنگەردىڭ جادىنان شىققان ەمەس. ەڭ جاس جاۋىنگەر قاندى، قارالى كۇندەر اياقتالسا دا ەلىنە بىردەن قايتپاي، 1950 -جىلعا دەيىن گەرمانيادا اسكەري سالادا قىزمەت ەتەدى. «وتان سوعىسىنىڭ ارداگەرى»، «ۆارشاۆانى جاۋدان ازات ەتكەنى ءۇشىن»، «بەرليندى العانى ءۇشىن» مەدالدەرىمەن ماراپاتتالادى.
وتكەن كۇندەر ەستەلىگى كوكىرەگىندە سايراپ تۇرعان ارداگەر بۇگىنگى بەيبىت زامان مەن توقشىلىق ومىرگە ءتاۋبا ەتەدى. شاڭىراعىنا كەلگەن قوناقتارعا «بۇگىنگى ۇرپاق باقىتتى بالالىعىنان، جالىنداعان جاستىق شاعىنان ايرىلماسىن» دەگەن تىلەگىن ايتىپ، باتاسىن بەردى.
