بوكستان ازيالىق ىرىكتەۋ جارىسىندا «قازسپورت» تەلەارناسى جانكۇيەرلەرگە ۇلكەن سىيلىق جاساماق

استانا. قازاقپارات - قازىر قازاقستاندىق سپورتسۇيەر قاۋىمنىڭ نازارى قىتايدىڭ شيانان قالاسىندا بوكستان ءوتىپ جاتقان ازيالىق ىرىكتەۋ جارىسىنا اۋىپ تۇرعانى جاسىرىن ەمەس.

بۇگىن شيرەك فينالدىق كەزدەسۋلەر وتۋدە. استانا ۋاقىتىمەن 12.00 -دە باستالعان تۇسكە دەيىنگى باسەكەلەردە ونەر كورسەتكەن ابىلايحان ءجۇسىپوۆ، ادىلبەك نيازىمبەتوۆ، يۆان دىچكو جەڭىستى جولدارىن جالعاستىردى. قىزدار اراسىندا سىنعا ءتۇسىپ جاتقان داريعا شاكىموۆا قارسىلاسىن جەڭىپ، جارتىلاي فينالعا جولداما الدى. ال نازىم يشانوۆا قىتايلىق بوكسشىعا ەسە جىبەرىپ الدى.

ال كەشكى ساعات 17.00 -دە وزگە سالماقتاعى بوكسشىلار شارشى الاعا شىقتى. بۇگىن ولجاس ساتتىبايەۆ، قايرات ەراليەۆ جانە جانىبەك ءالىمحان ۇلى جارتىلاي فينالعا شىعۋ ءۇشىن بار كۇشتەرىن سالاتىن بولادى.

ەل تۇرعىندارى ءۇشىن قىتايدىڭ شيانان قالاسىندا ءوتىپ جاتقان جارىستىڭ بارىسىن تاماشالاۋ مۇمكىن بولماي تۇر. دەگەنمەن قازاقستاندىق جانكۇيەرلەرگە «قازسپورت» تەلەارناسى ۇلكەن سىيلىق جاساپ وتىر. بوكستان ءوتىپ جاتقان ماڭىزدى ليتسەنزيالىق باسەكەنى ەل تۇرعىندارى تىكەلەي ەفيردە كورۋ مۇمكىندىگىنە يە بولماق.

«قازسپورت» تەلەارناسى 31 -ناۋرىز، بەيسەنبى كۇنىنەن باستاپ ازيالىق ىرىكتەۋ جارىسىن تىكەلەي ەفيردە كورسەتەدى دەپ كۇتىلۋدە. استانا ۋاقىتىمەن ساعات 12.00-دە «قازسپورت» تەلەارناسى العاشقى كورسەتىلىمىن باستايدى. اتاپ ايتقاندا، جارتىلاي فينالدىق تارتىستى باسەكەدە -46، -49، -56، -64، -75 كيلو سالماقتاعى ەرلەر، (-48، -51، -57، -60، -69، -75 كيلو) سالماقتاعى قىزدار شارشى الاڭعا شىعادى.

ال سول كۇنى 16-00-دە -52، -60، -69، -81، -91، +91 كيلو سالماقتاعى ەرلەر باق سىنايدى.

«قازسپورت» تەلەارناسىنىڭ باعدارلاماسىنا سايكەس، 1-2 -ءساۋىر كۇندەرى دە (ساعات 12.00 جانە 16.00) جارتىلاي فينالدىق جانە فينالدىق باسەكەلەر وتەدى دەپ جوسپارلانعان.

اۆتور: ايدىن بايمەن