ايگىلى «الماتى» قوناق ءۇيىنىڭ تاريحي كەلبەتى قايتا قالپىنا كەلتىرىلەدى
سولاردىڭ ءبىرى - كەڭەس زامانىندا سالىنعان «الماتى» قوناق ءۇيىن قايتا جاڭارتۋ.
«ءبىزدىڭ كومپانيا بۇل قوناق ءۇيدى 2006 -جىلى اشىق ءباسساۋدادا ساتىپ العان بولاتىنبىز. العاشىندا ءبىز ونى ءسۇرىپ تاستاپ، ورنىنا زاماناۋي ۇلگىدە جاڭا قوناق ءۇي سالۋعا نيەتتەنىپ ەدىك. ءبىراق، كەيىن ونىڭ قالا ارحيتەكتۋراسىنا جاقسى ۇيلەسەتىن عيمارات ەكەندىگىنە كوز جەتكىزىپ، قايتا جاڭارتۋدى ۇيعاردىق. بۇل ءۇشىن ۇلى بريتانيادان ماماندار شاقىرىلدى. ولار بۇل قوناق ءۇيدىڭ قالاداعى ەڭ ادەمى عيماراتتاردىڭ ءبىرى ەكەندىگىن ايتتى»، - دەدى ن. سماعۇلوۆ.
ول سونىمەن قاتار، الەمدە بەلگىلى قوناق ءۇي جەلىلەرىنىڭ قۇرامىنا كىرمەيتىن، ءبىراق تۋريستەر اراسىندا وتە تانىمال جەكەلەگەن قوناق ۇيلەردىڭ بار ەكەندىگىن جەتكىزدى.
«ولاردىڭ باسقا قوناق ۇيلەرگە ۇقسامايتىن وزىندىك ءبىر ەرەكشەلىكتەرى بولادى. سوندىقتان، ءبىز بۇل قوناق ءۇيدىڭ تاريحي اتاۋىن قالدىردىق. ەندى سىرتقى جاعى مەن ىشكى كورىنىستەرىنە جوندەۋ جۇرگىزىلەدى، ينجەنەرلىك جەلىلەرى اۋىستىرىلادى. ال نومىرلەر قازاقشا، سلاۆياندىق جانە ەۋروپالىق ستيلدە جابدىقتالادى. بولمەلەر ۇلكەن ەمەس - 12-16 شارشى مەتردەن. ءبىز ولاردى قاز- قالپىندا قالدىردىق. قوناق ءۇي - ءۇش جۇلدىزدى بولادى. وندا spa نەمەسە باسسەيندەر جاسالمايدى. ال بولمەلەر ورتاشا باعالىق سەگمەنتتە بولادى»، - دەدى Astana Group پرەزيدەنتى.
سونداي-اق، ن. سماعۇلوۆ قازىر عيماراتتىڭ سىرتى اليۋكوبوندپەن قاپتالعاندىعىن، ال جاڭارتۋ جۇمىستارىنىڭ ارقاسىندا باستاپقى قالپىنا كەلتىرىلەتىندىگىن ايتتى.
«قوناق ۇيگە جاڭا، زاماناۋي جارىقتاندىرۋ جۇيەسى ورناتىلادى. الماتىلىقتار بۇل وزگەرىستەردى لايىقتى باعالايدى دەپ ويلايمىن»، - دەدى ول.
قوناق ءۇيدى جاڭارتۋ جوباسى باسقا دا جوبالارمەن بىرگە ۇستىمىزدەگى جىلدىڭ سوڭىنا دەيىن جۇزەگە اسىرىلادى. ولاردىڭ قاتارىندا «Mega Alma-Ata» ساۋدا ويىن- ساۋىق ورتالىعىنىڭ الدىنا سالىناتىن قازاقستان بويىنشا ەڭ بيىك كوزبەن شولۋ دوڭعالاعى دا بار.
ايتا كەتەلىك، «الماتى» قوناق ءۇيى 1967 -جىلى سالىنعان. قابانباي كوشەسىنىڭ بويىندا، اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ قاراما-قارسى تۇسىندا ورنالاسقان.
اۆتور: ايبوتا جاپپاربەرگەن
