كورەيا رەسپۋبليكاسى قازاقستانمەن مەملەكەتتىك قىزمەت سالاسىندا تاجىريبە الماسۋعا ءازىر
بۇل تۋرالى كورەيا رەسپۋبليكاسىنىڭ پەرسونالدى باسقارۋ ءمينيسترى لي گۋن مين كورەياعا جۇمىس ساپارىمەن بارعان استاناداعى مەملەكەتتىك قىزمەت سالاسىنداعى باسقارۋشى كوميتەتتىڭ ءتوراعاسى ءاليحان بايمەنوۆپەن كەزدەسۋ بارىسىندا حابارلادى.
باسقارۋشى كوميتەتتىڭ باسپا ءسوز قىزمەتى حابارلاعانداي، ءا. بايمەنوۆ ءمينيستردى وڭىرلىك حاب قىزمەتىمەن جانە قازاقستاننىڭ بەس ينستيتۋتسيونالدىق رەفورمالارىن ىسكە اسىرۋ بويىنشا «ۇلت جوسپارى - 100 ناقتى قادامنىڭ» كاسىبي مەملەكەتتىك اپپاراتتىڭ تيىمدىلىگىن ارتتىرۋ بويىنشا نەگىزگى قىرلارىمەن تانىستىردى.
مينيستر لي گۋن مين مەملەكەتتىك قىزمەت سالاسىنداعى ءبىلىم مەن تاجىريبە الماسۋعا ارنالعان حالىقارالىق پلاتفورما رەتىندە وڭىرلىك حاب قىزمەتىنە جوعارى باعا بەرىپ، وسى سالادا ىنتىماقتاستىقتى جالعاستىرۋعا مۇددەلىلىك تانىتتى.
ساپار اياسىندا ءاليحان بايمەنوۆ كورەيا رەسپۋبليكاسى ادام رەسۋرستارىن دامىتۋ ۇلتتىق ينستيتۋتىنىڭ پرەزيدەنتى وك دونك سۋكپەن كەزدەستى. كەزدەسۋ بارىسىندا تاراپتار وڭتۇستىك كورەيلىك تاجىريبە نەگىزىندە حابقا قاتىسۋشى ەلدەر مەملەكەتتىك قىزمەتشىلەرىنىڭ الەۋەتىن ارتتىرۋ بويىنشا بىرلەسكەن سەمينارلار ۇيىمداستىرۋ، بىرلەسكەن تاقىرىپتىق زەرتتەۋلەر جۇرگىزۋ، تاراپتاردىڭ ەكسپورتتىق جەلىلەرىن كەڭەيتۋ سياقتى وڭىرلىك حاب اياسىنداعى ىنتىماقتاستىقتىڭ ىقتيمال باعىتتارىن تالقىلادى.
