كرەمل پۋتينگە اقپاراتتىق شابۋىل جاسالاتىنىن مالىمدەدى
بۇل تۋرالى ورتالىق ازيا جاڭالىقتارى حابارلايدى.
پەسكوۆ ءبىرقاتار ەلدىڭ جۋرناليستەرى قۇرامىنا كىرەتىن جۋرناليستىك زەرتتەۋلەردىڭ حالىقارالىق كونسورتسيۋمىنان (CIJI) «تەرگەۋ سۇراقتارىنا ۇقسايتىن ساۋالدارعا» جاۋاپ بەرۋ تۋرالى وتىنىشتەر تۇسكەنىن ايتتى.
«ءبىز جۋرناليستەر عانا ەمەس وزگە دە ۇيىم جانە قىزمەت وكىلدەرىنىڭ وسىعان دايىندالىپ جاتقانىنا سەنىمدىمىز. ولار جاقىن كۇندەرى گەرمانيا، ا ق ش، ۇلى بريتانيا، شۆەيتساريا، رەسەي جانە وزگە دە ءبىرقاتار ەلدە جينالىپ، وسىنداي جازبالارىن جاريالاماق»، - دەدى ول.
جۋرناليستىك زەرتتەۋلەردىڭ حالىقارالىق كونسورتسيۋمىن قىزىقتىرعان سۇراقتارعا بايلانىستى پەسكوۆ: «اڭگىمە پۋتيننىڭ جەكە باسى تۋرالى، ونىڭ وتباسى، دوستارى مەن بالالىق شاعى تۋرالى، پۋتيننىڭ بالا كەزدەگى دوستارى جايلى، كاسىپكەرلەر تۋرالى (كوۆالچۋك، روتەنبەرگ) بولدى جانە ولاردى قايداعى ءبىر وفشورلىق كومپانيالار تۋرالى اقپارات قىزىقتىرادى»، - دەدى.
سونىمەن قاتار پەسكوۆتىڭ ايتۋىنشا، ءبىرقاتار تانىمال حالىقارالىق اقپارات اگەنتتىك ماقالالار دايىنداپ جاتقان كورىنەدى. پەسكوۆ ولاردى كوپە-كورىنەۋ «تاپسىرىس» دەپ اتاپ، كرەملدىڭ تۇسكەن ساۋالدارعا جاۋاپ بەرمەيتىنىن مالىمدەدى.
