الماتىداعى «مەدەۋ» اۋماعى قوقىستان تازارتىلدى

الماتى. قازاقپارات- الماتى ىرگەسىندەگى «مەدەۋ» بيىك تاۋلى سپورت كەشەنىنىڭ اۋماعىندا سەنبىلىك جۇرگىزىلدى.

بۇل تۋرالى بۇگىن الماتى قالاسى اكىمىنىڭ باسپا ءسوز قىزمەتىنەن حابارلادى.

ءىس-شارا «مەدەۋ» مەملەكەتتىك وڭىرلىك تابيعي پاركىن دامىتۋ كەشەندى جوسپارى اياسىندا جۇزەگە اسىرىلدى.

سەنبىلىككە «مەدەۋ» ساياباعىنىڭ قىزمەتكەرلەرى، حالىقارالىق بيزنەس ۋنيۆەرسيتەتى، قازاق قاتىناس جولدارى ۋنيۆەرسيتەتى جانە ت. رىسقۇلوۆ اتىنداعى جاڭا ەكونوميكالىق ۋنيۆەرسيتەتتىڭ ستۋدەنتتەرى - بارلىعى 225 ادام قاتىستى.

«مەدەۋ» مەملەكەتتىك وڭىرلىك تابيعي پاركى مەملەكەتتىك مەكەمەسىنىڭ قىزمەتكەرلەرى 100 ۇيەڭكى اعاشىنىڭ كوشەتىن وتىرعىزدى. ايتا كەتەلىك، اعاش وتىرعىزۋ جۇمىستارى بۇكىل كوكتەمگى جانە جازعى كەزەڭدە جالعاساتىن بولادى.

سەنبىلىككە قاتىسۋشىلار سونىمەن قاتار، «مەدەۋ» ساياباعىنىڭ اۋماعىن جانە كىشى الماتى وزەنىنىڭ ارناسىن، («مەدەۋ» مۇز ايدىنىنان باستاپ، «مەدەۋ» ساياباعىنىڭ ەڭ تومەنگى شەكاراسىنا دەيىن) بارلىعى 120 گەكتار جەردى قوقىستاردان جانە قۋراعان اعاش- تالدان تازارتتى. سونداي- اق، 5 تۋريستىك دەمالىس ورىندارى دا تۇرمىستىق قالدىقتاردان تازارتىلدى. سەنبىلىككە قاتىسۋشىلاردىڭ بارلىعى قاجەتتى قۇرال- سايماندارمەن قامتاماسىز ەتىلدى.

اتالعان شارانى ۇيىمداستىرۋشىلار قالا تۇرعىندارىن تابيعاتتى ايالاي بىلۋگە شاقىرادى.