پەتروپاۆلدا ءۇي- كۇيسىز ادامداردى تۇنەتەتىن ارنايى مەكەمە مىڭ قاڭعىباستى ۇسىكتەن قۇتقارعان
ياعني، تۇرعىلىقتى مەكەن جايى جوق ادامداردىڭ اراسىندا بىردە- ءبىر ءولىم تىركەلمەگەن. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ق ر ءى ءى م جانىنداعى قوعامدىق كەڭەستىڭ ءتوراعاسى مارات قوعاموۆ ءمالىم ەتتى.
«2015 -جىلدىڭ قاراشاسىنان باستاپ وسى ۋاقىتقا دەيىن پەتروپاۆل قالاسىنداعى تۇنگى ارنايى مەكەمەدە 1250 ادام تۇنەپ، دارىگەرلەردىڭ تەكسەرۋىنەن وتكەن. سولتۇستىكتىڭ قىسى قاتتى ەكەنىن ءبارىمىز بىلەمىز، بۇل ارنايى مەكەمە بولماعاندا، ءۇي- كۇيى جوق ادامدار ءۇسىپ قالار ەدى»، - دەيدى ول.
م. قوعاموۆتىڭ ايتۋىنشا، پوليتسيا مەن قالا اكىمدىگى اقىلداسا كەلە، تۇرعىلىقتى مەكەنجايى جوق ادامداردىڭ ولىمىنە جول بەرمەۋ ءۇشىن وسىنداي تۇنەۋ ورنىن اشقان. ارنايى مەكەمە قالادا بوس تۇرعان تەمىرجول ورتا مەكتەبىنىڭ عيماراتىنان اشىلعان.
«قوعامدىق كەڭەستىڭ جۇمىسى اياسىندا مەن سول مەكەمەگە بارىپ، ءبىراز اداممەن اڭگىمەلەستىم. مەنىڭ ويىمشا، الەۋمەتتانۋشىلار، پسيحولوگتار مەن كريمينولوگتار ءدال وسىنداي مەكەمەلەرگە بارىپ كورۋى كەرەك. سوندا عانا قاڭعىباس اتانىپ كەتكەن وسى ادامداردى بۇل كۇيگە تۇسىرگەن نەندەي ماسەلە ەكەنىن بىلەمىز. ال ءوز تاراپىمنان ايتارىم، ءۇي- كۇيىنەن ايىرىلعان ادامداردىڭ ءبىرازىن تولىق مەديتسينالىق تەكسەرۋدەن وتكىزىپ، قايتا جۇمىسقا ورنالاستىرۋعا بولادى. جاسىرماي ايتسام، مەن سويلەسكەن «قاڭعىباستاردىڭ» اراسىندا ساۋاتتى سويلەيتىن مۇعالىمدەر دە بار ەدى. ولاردىڭ وسىنشاما اۋىر حالگە ءتۇسۋى - ارينە تراگەديا»، - دەيدى م. قوعاموۆ قوعامدىق كەڭەستىڭ س ق و وبلىسى بويىنشا اتقارعان جۇمىسىن حابارلاي وتىرىپ.
اۆتور: كەنجەكەي توقتامۇرات قىزى
