جەتى جاسار مۇستافا قۇراندى جاتقا وقۋ جارىسىندا جەڭىمپاز اتاندى - فوتو

پاۆلودار. قازاقپارات - پاۆلودارداعى «اقمەشىت» مەشىتىندە قۇراندى جاتقا وقۋ سايىسى ءوتتى. بۇل - ايماقتا ۇيىمداستىرىلعان تۇڭعىش قۇران وقۋ جارىسى.

باسەكەگە 6-30 جاس ارالىعىنداعى 40 ۇمىتكەر قاتىستى، دەپ حابارلايدى pavlodarnews.kz.

- وڭىرىمىزدە قۇراندى جاتقا وقۋ جارىسى ءبىرىنشى رەت وتكىزىلسە دە، قاتىسۋشىلاردىڭ قاتارى قالىڭ. بۇل جارىستا توپ جارعاندار الداعى قاسيەتتى رامازان ايىندا وتەتىن وبلىستىق قۇراندى جاتقا وقۋ جارىسىنا جولداما الدى. قاتىسۋشىلاردىڭ ىشىنەن بولاشاقتا ەسىمدەرى ەلگە ءماشھۇر قاريلار شىعارىنا سەنەمىز. ساۋاپتى سايىسقا اتسالىسقان ازاماتتارعا، اسىرەسە پاۆلودار اۋدانىنا قاراستى اۋىل مەشىتتەرىنىڭ يمامدارىنا ريزاشىلىعىمىزدى بىلدىرەمىز، - دەيدى «اقمەشىت» مەشىتىنىڭ باس يمامى جولداس قاجى قوسپاق ۇلى.

ۇمىتكەرلەر ءۇش توپقا ءبولىنىپ، ونەر كورسەتتى. 10 سۇرەنى جاتقا وقۋدا 12 جاستاعى پاۆلودارلىق سالاحاددين بەردىمۇرات توپ جاردى. ال 22 سۇرەنى جاتقا وقۋ جارىسىندا 10 جاستاعى مۇحاممەد تاشاي ۇزدىك دەپ تانىلدى. جارىستىڭ ەڭ كىشكەنتاي قاتىسۋشىسى مۇستافا قۇداباي 30 سۇرەنى جاتقا وقۋ سايىسىندا جەڭىمپاز اتاندى. جالپى، مۇستافا 37 سۇرەنى جاتقا بىلەدى.

ايتا كەتەرلىگى، سايىستا پاۆلودار قالاسىنداعى مەشىتتەردىڭ شاكىرتتەرىنەن بولەك، پاۆلودار اۋدانىنا قاراستى اۋىلداردىڭ وكىلدەرى دە باق سىنادى. قۇراندى جاتقا وقۋ جارىسىنىڭ قورىتىندىسى بويىنشا جەڭىمپازدار قوماقتى اقشالاي سىيلىققا يە بولدى. جۇلدەگەرلەر دە اقشالاي سىيلىقتاردى قانجىعاعا بايلادى. پاۆلودار اۋدانى جامبىل اۋىلىنىڭ وكىلى 17 جاستاعى قاسەن ءابدىراقىم، پاۆلودارلىقتار 30 جاستاعى دانيار نۇرسەيىت پەن 14 جاستاعى قايم دانساليكوۆ ىنتالاندىرۋ سىيلىعىن ولجالادى.