قازاق ءتىلى وليمپياداسىندا وڭتۇستىك كورەيالىق وقۋشى جەڭىسكە جەتتى

استانا. قازاقپارات - دارىندى وقۋشىلاردى قولداۋ جانە انىقتاۋ ماقساتىندا «دارىن» رەسپۋبليكالىق عىلىمي- پراكتيكالىق ورتالىعى مەملەكەتتىك ءتىلدى دامىتۋ قورىنىڭ قولداۋىمەن 25-26 - ناۋرىز ارالىعىندا استانا قالاسىندا 5-10 - سىنىپ ارالىعىندا وقيتىن وزگە ۇلت وقۋشىلارى اراسىندا قازاق تىلىنەن X «ءتىل - مەملەكەت تاۋەلسىزدىگىنىڭ سيمۆولى» اتتى رەسپۋبليكالىق قاشىقتىقتان ۇيىمداستىرىلعان وليمپياداسىن وتكىزدى.

وليمپيادا ەكى كەزەڭدە ءوتتى: ونلاين رەجيمدە وتكەن 1 - كەزەڭگە 2847 وقۋشى قاتىستى. ەڭ جوعارى ۇپاي جيناعان 114 وقۋشى استانا قالاسىنداعى «نۇر وردا» مەكتەپ- ليسەيىنىڭ بازاسىندا وليمپيادانىڭ قورىتىندى كەزەڭىنە قاتىسۋعا شاقىرىلدى. قورىتىندى كەزەڭگە 72 وقۋشى مەن ولاردىڭ قازاق ءتىلى ءپانىنىڭ 32 ءمۇعالىمى قاتىستى.

 وليمپيادانىڭ جەڭىمپازى جانە I دارەجەلى ديپلوم يەگەرى بولىپ وڭتۇستىك كورەيا ازاماتشاسى، الماتى قالاسى №159 گيمنازياسىنىڭ وقۋشىسى پاك شي- ىن تانىلدى. II دارەجەلى ديپلومنىڭ يەگەرى بولىپ وڭتۇستىك قازاقستان وبلىسى ماقتارال اۋدانىنان وزبەك ۇلتىنىڭ وكىلى باحور سۇلەيمەنوۆا تانىلدى، III دارەجەلى ديپلوم يەگەرى - سەمەي قالاسىنان نەمىس ۇلتىنىڭ وكىلى شەينا ادەلينا.

 مەرەكە سوڭىندا وليمپيادا قاتىسۋشىلارى قازاقتىڭ تانىمال كومپوزيتورى نۇرعيسا تىلەنديەۆتىڭ «اتا تولعاۋ» كۇيىن، مۇقاعالي ماقاتايەۆتىڭ «قارا سازىن» ورىنداپ بەردى، دەپ حابارلايدى مەملەكەتتىك ءتىلدى دامىتۋ قورىنىڭ باسپا ءسوز قىزمەتى.