جەۋگە بولاتىن تاۋ تابىلدى

استانا. قازاقپارات - يران مەملەكەتىنىڭ ورمۋز ارالىندا ورنالاسقان بۇل قىزىل تاۋدى جەۋگە بولاتىن كورىنەدى. دالىرەك ايتقاندا، جەيتىن تاماعىڭىزدى دامدىلەۋ ماقساتىندا قولدانۋعا بولادى. ءتىپتى، بۇل دامدەۋىشتى يران اسحاناسىنىڭ اجىراماس ءبىر بولشەگى دەسەك تە بولادى.

جەرگىلىكتى حالىق بۇل دامدەۋىشتى «گەلياك» دەپ اتايدى.

دامدەۋىشتى دايىنداۋ ءۇشىن، ەڭ الدىمەن، تاۋدىڭ قىزىل تاسىن سۋعا ارالاستىرادى. ءسال تۇندىرىپ العاننان كەيىن سۋىن بولەك قۇيىپ الادى. وعان ورمۋز ارالدارىندا وندىرىلەتىن تۇز قوسىپ، دامدەۋىش دايىنداپ شىعارادى.

قىزىل ءتۇستى بۇل تاۋ ورمۋز ارالىنىڭ وڭتۇستىك بولىگىندە 300 مەتر بيىكتىكتە ورنالاسقان. تاۋ توپىراعىنان تەك دامدەۋىش قانا ەمەس، كەراميكالىق ونىمدەر مەن بوياۋ دا وندىرىلەتىن كورىنەدى.

 muslim.kz