ورالدىق شەبەرلەر دومبىراعا قويدىڭ ىشەگىن پايدالانادى

استانا. قازاقپارات -  ورالدا ءوز قولىنان شىققان دومبىرا اسپابىنا ادەتتەگى ىشەكتى ەمەس، قويدىڭ ىشەگىن پايدالاناتىن شەبەرلەر تۇرادى.

 ولار ءدۇلدىل كۇيشى قۇرمانعازى اتىن يەلەنگەن ساز كوللەدجىنىڭ ۇستازدارى -  باقتىگەرەي سۇلەيمەنوۆ پەن اسىلان سەرىكبايەۆ.

«ناعىز قازاق قازاق ەمەس، ناعىز قازاق -  دومبىرا». ال ونىڭ تابيعي قوڭىر ءۇنى قازىر تەك كۇيتاباقتاردا عانا ساقتالىپ قالعان. «ماقساتىمىز -  بالبارماق كۇيشىلەرگە ساپالى اسپاپ ۇسىنۋمەن بىرگە وسى ءبىر باعا جەتپەس قازىنانى حالقىمىزعا قايتارۋ»، - دەيدى وزدەرى. باقتىگەرەي سۇلەيمەنوۆ ۋاقىتىنىڭ كوپ بولىگىن وسى شاعىن شەبەرحانادا وتكىزەدى. ءبىراق، شاعىن دەگەن اتى عانا. جاسالاتىن جۇمىستاردىڭ اۋقىمى مەن ءمان- مازمۇنى تەرەڭ. ۇمتىلا باستاعان ونەردى ۇلىقتاپ جۇرگەن شەبەر ۇلتتىق ساز اسپاپتارىن جاساۋعا دەن قويعان.

«ماقساتىم -  عاسىرلار سىرىن بۇگىنگە جالعاعان كيەلى اسپاپتىڭ قادىر- قاسيەتىن ارتتىرۋ. ءبىراق، بۇل وتە قيىن ءىس. تالماس تالاپ پەن ۇزدىكسىز ىزدەنىس بولعاندا عانا ءدۇبىرلى دوداعا تۇسەر ءدۇلدىل دومبىرانى دۇنيەگە اكەلەسىڭ»، - دەيدى ءوزى.

باقتىگەرەي سۇلەيمەنوۆ، شەبەر:

 - ساز اسپابى بولعاننان كەيىن ءۇن شىعۋى كەرەك قوي. كادىمگى قازاقي، قوڭىر، دومبىرانىڭ وزىنە ءتان، باياعىدان كەلە جاتقان، سونى ىزدەيسىڭ. قانشا شەبەر بولساڭ دا، ءومىر باقي سونى ىزدەپ وتەسىڭ.

 كەيىپكەرىمىز كەزىندە كونسەرۆاتوريا شەبەرحاناسىندا تاجىريبەسىن شىڭداپتى. كەيىن ءوزى دە ۇستالىققا ءبىرجولا بەت بۇرىپ، بىلگەنى مەن تۇيگەنىن شاكىرتتەرىنە ۇيرەتتى. سولاردىڭ ءبىرى جاس ۇستاز اسىلان سەرىكبايەۆ وسى كوللەدجدە ءدارىس بەرەدى. قولىنان قاشاۋى تۇسپەيتىن ونى كۇمبىرلەگەن قوڭىر ءۇندى قايتسەم تابامىن دەگەن وي ءجيى مازالايدى. قوس ىشەكتەن شىعار ءۇننىڭ شىنايى ءارى تابيعي بولۋى بارىنەن ماڭىزدى. شەبەر- ۇستازدىڭ بۇل سالاداعى ىزدەنىسى ەلەڭ ەتكىزەرلىك.

 اسىلان سەرىكبايەۆ، قۇرمانعازى اتىنداعى ساز كوللەدجىنىڭ ساندىك قولدانبالى ونەر جانە ديزاين ءبولىمىنىڭ وقىتۋشىسى:

 - قويدىڭ ىشەگىنەن ارنايى جاسالعان ىشەكتە كىشكەنە ءبىر جابايىلىق ءۇن بولادى. تابيعيلىعى جاقسى. سوسىن ەسكى تاسپالارداعى، بۇرىنعى دينا شەشەمىزدىڭ تارتقان كۇيلەرى، سونداي دىبىستاردى ىزدەيمىز عوي، كىشكەنە سوعان ۇقساسا.

جاقسى دومبىرا جاساۋ ءۇشىن ەڭ الدىمەن ساپالى اعاش كەرەك. «ماسەلەن، رەسەي اۋماعىنداعى ورال تاۋلارىنىڭ باۋرايىندا وسەتىن بيىك شىرشالاردىڭ ءجونى بولەك. ءبىراق، ول قولعا تۇسە بەرمەيدى»، - دەيدى شەبەرلەر. ازىرگە ولار ءتۇرلى ساز اسپاپتارىن نەگىزىنەن ءشامشات اعاشىنان جاساپ ءجۇر.

www.24.kz