قازاق ساۋلەتشىسىنىڭ اينەك ءۇيى باتىس باسىلىمدارىنىڭ نازارىنا ىلىكتى - فوتو

استانا. قازاقپارات - قازاقستاندىق ساۋلەتشى ايبەك الماسوۆ جوبالاعان سيليندر پىشىندەس، ىشىندە ءوسىپ تۇرعان اعاشى بار ءتورت قاباتتى شىنى ءۇي دە باتىس باسىلىمدارىنىڭ نازارىنا ىلىككەن دەپ جازادى «ازاتتىق».

امەريكانىڭ Huffington Post سايتىنىڭ جازۋىنشا، ايبەك مۇنداي ءۇيدىڭ تۇرعىندارى «تابيعاتپەن ۇندەستىكتە ءومىر سۇرەتىن» بولادى دەپ بىلەدى. ساۋلەتشى جوباسىنداعى ءۇيدىڭ شىنى قابىرعالارى كۇن باتارەيالارى بار ءمولدىر جابىندىلاردان قالانادى. بۇعان قوسا تۇرعىندار پايداسىنا جاراتۋ ءۇشىن جاۋىن سۋىن تازارتاتىن جۇيە دە بولادى.

«شىن مانىندە، ونى [ءۇيدى] سالۋ ونشا قيىن ەمەس. وعان ينۆەستور تابۋ قيىن بولدى. قازىر ەكى ينۆەستور تاپتىق. ءبىرىنىڭ كۇن باتارەيالارى ورىلگەن شىنى پانەلدەر شىعاراتىن زاۋىتى بار. ول جوباعا قىزىعىپ وتىر، قازىر ونىمەن كەلىسسوز جۇرگىزىپ جاتىرمىز»، - دەگەن ايبەك الماسوۆتىڭ سوزدەرىن Dezeen ارحيتەكتۋرا جانە ديزاين جۋرنالى كەلتىرگەن.

ايبەك الماسوۆتىڭ ويىنداعى ءۇيدىڭ جوباسىن ىسكە اسىرۋعا تالپىنىپ جۇرگەنىنە بىرنەشە جىلدىڭ ءجۇزى بولعان. ونىڭ ايتۋىنشا، ءۇي قۇرىلىسىن 2017-جىلى باستاۋ جوسپارلانعان. Huffington Post سايتىنىڭ حابارلاۋىنشا، الماسوۆ جەرگىلىكتى بيلىك ورىندارىنا ول ءۇيدى جۇرت ارالاپ كورەتىندەي ەتۋدى ۇسىنعان.