استانادا اپات جاعدايىندا قونعان ۇشاقتىڭ ەكىنشى پيلوتىنىڭ اتاسى دىنمۇحامەد قونايەۆتىڭ جەكە ۇشقىشى بولعان
قىزىلوردادان ۇشىپ شىققان ۇشاق الدىڭعى شاسسيسىز (دوڭعالاعى) قونعان ەدى.
سمەرەچانسكي قونۋ كەزىندە ۋايىمداۋعا دا ۋاقىتتىڭ بولماعانىن، ەموتسيانىڭ ۇشاق جەرگە قونعاندا عانا تۋلاپ قويا بەرگەنىن ايتتى.
«ءبىز قونعالى جاتقان كەزدە شاسسيدىڭ اشىلماعانىن ەسكەرتەتىن دابىل قوسىلدى. سودان ءبىز شاسسيسىز قونۋعا بەل بۋدىق. (...) ءبىز ءار جارتى جىل سايىن دايىندىقتان وتەمىز، بەيستاندارت پروتسەدۋرالاردى وتكەرەمىز، سوندىقتان ءبىز دايىن بولدىق. ءبىراق وقيعا شىن مانىندە ءوز ومىرىڭدە بولىپ جاتقاندا ءبارى باسقاشا. مەن مۇنداي جاعدايعا ءبىرىنشى رەت تاپ بولدىم. وزىمە كەلەتىن بولسام، وقيعا كەزىندە ۋايىمداۋعا ۋاقىتىم بولمادى، سەبەبى ۇشاق ۇشىپ بارا جاتتى، جىلدام شەشىم قابىلداۋعا تۋرا كەلدى. ۋايىم ۇشاق جەرگە قونعاندا باستالدى. ءبىراق بۇل ۋايىم بارلىعىنىڭ ءتىرى ءارى امان-ەسەن بولۋىنا قاتىستى قۋانىش بولدى»، - دەدى پيلوت.
ول بۇل اۋە كومپانياسىندا 2014-جىلدان بەرى جۇمىس ىستەيتىنىن، ازاماتتىق اۆياتسيا اكادەمياسىن بىتىرگەن 2009-جىلدان باستاپ ۇشىپ جۇرگەنىن ايتتى. سمەرەچانسكيدىڭ ايتۋىنشا، ول اۆياتسيانى كاسىپ ەتكەن جانۇيادا دۇنيەگە كەلگەن، ونىڭ اتاسى دىنمۇحامەد قونايەۆتىڭ جەكە پيلوتى بولعان ەكەن.
«بىزدە جانۇيا ديناستياسى، اتام - ۇشقىش، اكەم پيلوت، مەن دە ءۇشىنشى ۇرپاقپىن. (...) بالا كەزىمدە اتاممەن بىرگە ۇشاتىنمىن، ءبىراق اكەممەن كوپ ۇشتىم، قاراپ، ۇيرەنىپ، اۆياتسيالىق جانۇيادا ءوستىم، اڭگىمەمىز تەك ۇشاق جايىندا بولاتىن. ءبىرىنشى سىنىپتان باستاپ پيلوت بولۋدى ارماندادىم»، - دەدى ول.
وسىعان دەيىن Bek Air اۋە كومپانياسىنىڭ «فوككەر-100» ۇشاعىنىڭ كومانديرى دميتري رودين شاسسيى جوق ۇشاقتى قالاي قوندىرعانى جايلى ايتىپ بەرگەن بولاتىن.
ەسكە سالا كەتەيىك، كەشە Bek Air اۋە كومپانياسىنىڭ قىزىلوردادان ۇشىپ كەلگەن ۇشاعى استانا اۋەجايىندا اپاتتى جاعدايدا قونعان بولاتىن. ۇشاق الدىڭعى شاسسيسىز قونعان. وقيعا ساعات 10.30 دا بولدى. ايتا كەتەيىك، اپاتتى جاعدايعا بايلانىستى اۋەجاي جۇمىسىن ساعات 13.00 گە دەيىن توقتاتتى. سونىمەن قاتار، كوماندير مەن ەكىنشى پيلوت ۇكىمەتتىك سىيلىققا ۇسىنىلادى ەكەن.
