استاناعا اپاتتى جاعدايدا قونعان ۇشاق جولاۋشىسى وقيعانى ايتىپ بەردى
«ۇشاق ءۇشىنشى اينالىمعا كوشكەندە، وزەننىڭ ۇستىنەن ءۇشىنشى رەت وتكەنىمىزدى بايقادىم. بىردەن توتەنشە جاعدايدىڭ بولعانىن سەزدىم. ارادا بىرنەشە مينۋت وتكەندە ەكيپاج مۇشەلەرى اپاتتى جاعدايدا قوناتىنىمىزدى حابارلادى. جولاۋشىلار شۋ كوتەرمەي، سابىر ساقتاپ وتىردى. ۇشاق جەرگە قاتتى سوعىلعان جوق، تەك كومانديردىڭ تەجەگىشتى بىردەن ىسكە قوسقانىن سەزدىك. بالكىم، جولاۋشىلاردىڭ ىشىندە جۇيكەسى سىر بەرگەندەر بار بولار، الايدا، ەشكىم جارالانعان جوق. سالوندا قىزمەت ەتىپ جۇرگەن ستيۋاردەسسالار مەن ستيۋاردتاردىڭ ارقاسىندا بورتتا شۋ كوتەرىلگەن جوق. ولار بىزگە نەنى قالاي ىستەۋ كەرەك ەكەنىمىزدى باپپەن ءتۇسىندىردى. ءتىپتى، ۇشاقتىڭ الدىڭعى ءشاسسيىنىڭ (دوڭعالاعى) اشىلماي قالعانىن بىلگەن دە جوقپىز. ۇشقىشتار ارتقى ءشاسسيدىڭ كومەگىمەن ۇشاقتى شەبەر قوندىرا ءبىلدى. ۇشاق قونعان سوڭ شىعاتىن ەسىككە قاراي جۇگىرىڭىزدەر دەدى. نۇسقاۋلىق بويىنشا مۇنىڭ دۇرىس نە بۇرىس ەكەنىن بىلمەيمىن، جولاۋشىلار ءبىرىن- ءبىرى سوعىپ، ەسىككە قاراي جاپا- تارماعاي جۇگىرە جونەلدى. ءبىز، ەرەسەك كىسىلەر، جولاۋشىلاردان تىنىشتالۋدى، اسىقپاي- اپتىقپاي شىعۋدى، اۋەلى بالالار مەن ايەلدەردى وتكىزىپ جىبەرۋدى سۇرادىق. وسىدان كەيىن ولار تىنىشتالىپ، ۇشاقتان بايىپپەن ءتۇستى» ، - دەيدى ەرنيازوۆ.
ونىڭ ايتۋىنشا، ۇشاقتىڭ جەڭىل قونۋى ءۇشىن اۋەجاي قىزمەتىنىڭ اتقارعان جۇمىسى وراسان.
«ۇشاق جەرگە قونعان سوڭ ايەلدەر ۇشقىشتى ماراپاتتاۋ تۋرالى پەتيتسيا جازدى. ەكيپاج، بورتسەرىكتەر جانە اۋەجايدىڭ قاۋىپسىزدىك قىزمەتتەرى ۇيلەسىمدى جۇمىس ىستەدى. ءبىز جەرگە قونعان ۋاقىتتا ارنايى تەحنيكالار ۇشاقپەن قاتار ءجۇرىپ، كوبىك شاشىپ وتىردى. وسىنىڭ ارقاسىندا ۇشاقتان ءورت شىقپاي، جەڭىل قوندى دەپ ويلايمىن. ارينە، ازداپ قورىققانىمىز راس، الايدا، بار سەزىمىمىزدى ىشتە ساقتاپ، بارىنشا سالقىنقاندىلىق تانىتتىق» ، - دەيدى زاپاستاعى گەنەرال- مايور.
ءالىمجان ەرنيازوۆ بورتتاعى جولاۋشىلاردىڭ جاعدايىن ءبىلۋ ءۇشىن كوپ ۇزاماي، ينۆەستيتسيالار جانە دامۋ ءمينيسترى اسەت يسەكەشيەۆ پەن اۋەجاي باسشىلىعى جەتكەنىن ايتتى.
«بىرنەشە مينۋت بۇرىن باگاجدارىمىزدى الدىق. ءبىزدى ۇشاق بورتىنا كەزەك- كەزەك اپارىپ، جۇكتەرىمىزدى ءتۇسىرىپ بەردى. ايتا كەتۋ كەرەك، اۋەجاي باسشىلىعى مەن مينيستر اسەت يسەكەشيەۆ شامامەن جارتى ساعات وتكەندە جەتتى. مينيستر وقيعاعا قاتىستى بارلىق سۇراقتارعا جاۋاپ بەرىپ، جۇكتەرىن العان جولاۋشىلاردى اۋەجايدا ۇستاماي، جىبەرە بەرۋگە تاپسىرما بەردى. مەن ينتەرناتسيوناليست جاۋىنگەرمىن، كەزىندە اۋعانستانداعى سوعىسقا قاتىسقان اداممىن. سول سەبەپتى بورتتاعى جولاۋشىلاردىڭ نە سەزىنگەنىن جاقسى تۇسىنەمىن. بارىنەن بۇرىن ۇشقىشقا مىڭ العىس، اۋىر جاعدايدا توزىمدىلىگى پەن شەبەرلىگىن كورسەتە ءبىلدى. باۋىرجان مومىش ۇلى: «قورىقپاعان باتىر ەمەس، قورقىنىشىن جەڭە بىلگەن باتىر» - دەگەن. ۇشقىشتار جارادى!» ، - دەيدى اۋعان سوعىسىنىڭ ارداگەرى.
ەسكە سالا كەتەيىك، كەشە تاڭعى ساعات 10:36-دا Bek Air اۋەكومپانياسىنا قاراستى قىزىلوردا- استانا باعىتىنداعى ۇشاق اپاتتى جاعدايدا جەرگە قونعان بولاتىن.
