ق ر سىرتقى ىستەر مينيسترلىگى رەسەيلىك «ايەروفلوت» پەن «ەير استاناعا» قاتىستى داۋلى جاعدايعا تۇسىنىك بەردى
«ايەروفلوت» كومپانياسىنىڭ رەيستەرىنىڭ ۇشىرىلماۋىنا قاتىستى اقپارات الىنعان ساتتەن، سونىمەن بىرگە، بۇقارالىق اقپارات قۇرالدارىندا «ەير استانا» كومپانياسىنا رەسەي فەدەراتسياسىنا ۇشۋ رەيستەرىن جاساۋعا تىيىم سالىنعانى تۋرالى اقپاراتتارعا قاتىستى، قازاقستاننىڭ رەسەيدەگى ەلشىلىگى ورىن العان پروبلەمالىق جاعدايدىڭ بارىسىن ءجىتى قاداعالاپ وتىر. بۇل، اسىرەسە ەڭ ءبىرىنشى كەزەكتە شەگەرىلگەن رەيستەردەگى قازاقستاندىق جولاۋشىلارعا قاتىستى بولىپ تابىلادى»، - دەدى ءانۋار جايناقوۆ.
ونىڭ ايتۋىنشا، ورىن العان وقيعاعا بايلانىستى ەلشىلىكتىڭ كونسۋلدىق قىزمەتكەرلەرى ماسكەۋدەگى شەرەمەتيەۆو اۋەجايىنا بارىپ، وندا قازاقستاندىق باعىتقا قاتىنايتىن «ايەروفلوت» كومپانياسى رەيستەرىنىڭ بارلىق تەرمينالدارىن ارالاپ شىعىپ، قازاقستان ازاماتتارىمەن كەزدەسىپ، اڭگىمەلەسكەن. وندا جاعداي قالىپتى، ال ورىن العان وقيعانى وڭ شەشۋ باعىتىندا جۇمىستار اتقارىلىپ جاتقانىنا كوز جەتكىزىلگەن.
«سونىمەن قاتار، ق ر ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتى «ايەروفلوت» كومپانياسىنا ۇشۋعا قاجەتتى رۇقساتتاردى بەرگەنى، ونىڭ 27 - ناۋرىزعا جوسپارلانعان رەيستەرى كەستە بويىنشا اتقارىلاتىنى ناقتىلاندى. رەسەيلىك اۆياكومپانيانىڭ حابارلاۋىنشا، 27 - ناۋرىزدا ساعات 07.00 باستاپ قازاقستانعا بارلىق رەيستەر قالپىنا كەلتىرىلگەن: اتىراۋ، اقتاۋ، اقتوبە، الماتى، استانا، قاراعاندا، شىمكەنت. رەسەيلىك تاراپتىڭ راستاۋى بويىنشا «ەير استانا» كومپانياسىنا قاتىستى رۇقسات بەرۋ جۇمىستارى جاقىن ۋاقىتتا قالپىنا كەلتىرىلەدى»، دەدى ءا. جايناقوۆ.
مالىمەتتەر بويىنشا «ايەروفلوت» 26 - ناۋرىزدا ۇشا الماعان جولاۋشىلار وتىنىشىنە وراي بيلەتتەردى باسقا رەيستەر بويىنشا نەمەسە جاقىن رەيستەرگە الماستىرىلعانىن حابارلايدى (اتىراۋ - استراحان ورنىنا، الماتى - بىشكەك).
«ايەروفلوت» كومپانياسىنىڭ قىزمەت كورسەتۋ دەپارتامەنتى ءبولىم باسشىسىنىڭ ورىنباسارى ەلەنا پاستۋحوۆانىڭ سوزىنە قاراعاندا، 26 - ناۋرىز كۇنى قازاقستانعا ۇشىرىلماعان رەيستەردىڭ بارلىق جولاۋشىلارى اۋەجاي ماڭىنداعى قوناق ۇيلەرگە جايعاستىرىلىپ، ءۇش مەزگىل تاماقپەن قامتاماسىز ەتىلگەن، كۇتۋ تەرمينالدارىندا قاجەتتى جاعدايلار جاسالعان.
بۇدان بولەك، س ءى م كونسۋلدىق قىزمەتكەرلەرى جولاۋشىلارعا ۇسىنىلعان قوناق ۇيلەردە بولىپ، ولاردىڭ ورنالاسۋ جاعدايلارىمەن دە تانىسىپ قايتقان. قازاقستان ازاماتتارى تاراپىنان ەلشىلىككە قانداي دا ءبىر وتىنىشتەر نەمەسە شاعىمدار جاسالماعان.
«قازاقستان ەلشىلىگى جاعدايدى باقىلاۋدى جالعاستىرادى، ەكى مەملەكەتتىڭ مۇددەلى مەملەكەتتىك ورگاندارىمەن، اۆياتسيالىق قىزمەتتەرىمەن ۇدايى بايلانىستا وتىر. شەرەمەتيەۆو اۋەجايىندا ەلشىلىك قىزمەتكەرلەرى كەزەكشىلىكتى ۇيىمداستىرۋدا»، - دەدى س ءى م باسپا ءسوز قىزمەتىنىڭ جەتەكشىسى.
اۆتور: قانات مامەتقازى ۇلى
