ەلوردادا «جامبىل جابايەۆ» كارتيناسىنىڭ تۇساۋكەسەرى ءوتتى - فوتو
دەپ حابارلايدى ۇلتتىق مۋزەيدىڭ اقپاراتىق- يميدجدىك قىزمەتى.
شارانىڭ سالتاناتتى اشىلۋىندا ءسوز العان ۇلتتىق مۋزەيدىڭ ديرەكتورى دارحان مىڭباي جامبىل جابايەۆتىڭ اقىندىق مۇراسى تۋرالى ايتا كەلە، جاڭا تۋىندىنىڭ اۆتورلارىنا العىس ءبىلدىردى.
«جىر الىبى جامبىل بابامىزدىڭ كەيىنگى ۇرپاعىنا ميراس رەتىندە قالدىرعان شىعارماشىلىق مۇراسى قازاق ادەبيەتىنىڭ التىن قازىناسى بولىپ تابىلادى. قانشا جىلدار وتسە دە جامبىل جابايەۆتىڭ ولەڭدەرى ومىرشەڭدىگىن جوعالتقان ەمەس. قايتا كەرىسىنشە، بىرنەشە تىلدەرگە اۋدارىلىپ، ءالى كۇنگە دەيىن كىتاپ بولىپ باسىلىپ شىعىپ جاتىر. قازاق دەگەن ەل باردا جىر الىبىنىڭ جىرلارى جاساي بەرمەك. سوندىقتان دا جامبىل اتامىزدىڭ كورگەن ءتۇسىنىڭ جەلىسىمەن سالىنعان مۇنداي كارتينانىڭ ۇلتتىق مۋزەيدىڭ تورىنەن ورىن الۋى ورىندى دەپ ويلايمىن»، - دەدى د. مىڭباي.
كارتينا اۆتورلارىنىڭ ءبىرى شاحماردان ايدوس ۇلتتىق مۋزەيدىڭ سۋرەتشىلەر جۇمىسىنا جاساعان قولداۋىنا العىس بىلدىرە كەلە، جاڭا تۋىندىنىڭ ەرەكشەلىگىنە توقتالىپ ءوتتى. «بۇل جۇمىسقا كىرىسپەس بۇرىن، جامبىل جابايەۆتىڭ ءومىرى مەن شىعارماشىلىعىنا تەرەڭ تانىسىپ شىقتىق. ايدار جامحانمەن اقىلداسا كەلە، اقىننىڭ 170 -جىلدىعىنا وراي وسىنداي دۇنيە جاساپ شىعاردىق. ۇلتتىق مۋزەيدىڭ قازاق سۋرەتشىلەرىنە جاساعان قامقورلىعىنا ەرەكشە العىس بىلدىرەمىز»، - دەدى ش. ايدوس.
سونىمەن قاتار شارا بارىسىندا قازاقستاننىڭ ەڭبەك سىڭىرگەن قايراتكەرى، سۋرەتشى سەمبىعالي سماعۇلوۆ اتالعان كارتينا اۆتورلارىن قۇتتىقتاپ، جاستارعا اقجول تىلەدى. «وسىنشاما جۇرتتى جيناپ، ءبىر عانا كارتينانى تانىستىرۋ ءداستۇرى ءبىزدىڭ ەلىمىزدە دە كەڭىنەن ءۇردىس الىپ كەلە جاتقانى كوڭىل قۋانتادى. بايقاپ وتىرمىن، سۋرەتشىلەر وتە جاقسى جۇمىس ىستەگەن. بارىنەن بۇرىن ونەرلى جاستارعا جاسالىپ جاتقان قولداۋلاردى كورىپ كوز قۋانادى. شاكىرتتەرىمە شىعارماشىلىق تابىس تىلەيمىن»، - دەدى س. سماعۇلوۆ.
ايتا كەتەيىك، كارتينادا قولىندا دومبىراسى بار، باسىنا قارا- قوڭىر ءتۇستى بورىك، ۇستىنە ۇلتتىق شاپان كيگەن اقىن بەينەلەنگەن. سونىمەن قاتار، قىزىل جولبارىستىڭ بەينەسىن جانە باسقۇر، كىلەم، تۇسكيىزدىڭ ەلەمەنتتەرىن كورۋگە بولادى. كومپوزيتسيانىڭ وڭ جاعىندا قازاقتىڭ كەڭ دالاسى مەن اسپانى، اسقار تاۋدىڭ بەينەسى سۋرەتتەلگەن.
ءىس- شارا بارىسىندا جامبىل جابايەۆ تۋرالى دەرەكتى فيلمدەر كورسەتىلىپ، استانا قالاسى ورتا مەكتەپتەرىنىڭ وقۋشىلارى جىردان شاشۋ شاشتى.
