استانادا ۇشاق اپاتتى جاعدايدا قوندى
ولاردىڭ ىشىندە Air Astana, SCAT، Bek Air اۋە كومپانيالارىنىڭ رەيستەرى بار.
قىزىلوردادان استاناعا ۇشقان، ساعات 10.00 قونۋى ءتيىس Bek Air Z9 2041 ۇشاعى 45 مينۋتقا كەشىكتى. ب ا ق حابارلاعانداي، اۋە كومپانياسىنىڭ بورتى اپاتتىق جاعدايدا قوندى.
كۋاگەرلەردىڭ ايتۋىنشا اۋە كەمەسىنىڭ الدىڭعى دوڭگەلەگى اشىلماي قالعان. دوڭگەلەكتىڭ ىستەن شىعۋىنا بايلانىستى ۇشاق 30 مەتر جەرگە دەيىن تۇمسىعىمەن جەر ءسۇزىپ بارىپتى. ال اۋە لاينەرىن كۇتىپ العان ءورت سوندىرۋشىلەر ماڭايعا كوبىك شاشىپ، قاتەردىڭ الدىن الۋعا تىرىستى. ابىروي بولعاندا ۇشاقتى تىزگىندەگەن تاجىريبەلى ۇشقىشتىڭ ارقاسىندا ەشكىم زارداپ شەككەن جوق. دەگەنمەن قۇتقارۋشىلار جولاۋشىلار اۋە كولىگىنەن تۇسە سالىسىمەن، ولاردى دەرەۋ قاۋىپسىز جەرگە الىپ كەتتى. وقيعا بۇگىن تاڭعى ساعات 10:30 شاماسىندا بولعان.
بۇل دەرەكتى استانا اۋەجايىنىڭ باسپا ءسوز قىزمەتى راستاپ وتىر.
نۇرلان جۇماسۇلتانوۆ، Bek Air اۋە كومپانياسى ديرەكتورلار كەڭەسىنىڭ ءتوراعاسى:
- ۇشقىش قونار الدىندا ۇشاقتىڭ تۇمسىعىن جوعارى كوتەرىپ وتىرعان. سوندىقتان سالوندا تەحنيكالىق اقاۋ ايتارلىقتاي سەزىلمەگەن. ۇشاق كومانديرى ناعىز شەبەرلىك تانىتتى. ونى مەملەكەتتىك ماراپاتقا دا ۇسىنۋعا بولادى. ال جولاۋشىلاردىڭ بارلىعى ءدىن امان.
