جامبىل وبلىسىندا كوكتەمگى دالا جۇمىستارى باستالىپ كەتتى
وڭىردە قازىردىڭ وزىندە 145 مىڭ گەكتارعا جۋىق جەر جىرتىلىپ، 110 مىڭنان استام اۋماققا جازدىق ماساقتى داقىلدار ەگىلگەن. وتكەن جىلمەن سالىستىرعاندا، بيىل ەگىس كولەمى ايتارلىقتاي وزگەرمەگەن.
تەك مايلى داقىلدار مەن قانت قىزىلشاسىنا باسىمدىق بەرىلەدى.
«جەرگىلىكتى ديقاندار بيىل سۋدان تارشىلىق كورمەيدى»، - دەيدى وبلىستىق اۋىل شارۋاشىلىعى باسقارماسىنىڭ باسشىسى نۇرجان نۇرجىگىتوۆ.
وڭىردەگى ەگىس القاپتارىن سۋارۋعا قاجەتتى تىرشىلىك ءنارىنىڭ %80- ى قىرعىز ەلىنەن كەلەدى. وسىعان بايلانىستى الداعى كۇندەرى كورشى ەل ۇكىمەتىنىڭ ءۇش وبلىسىنداعى ۋاكىلەتتى وكىلدەرىمەن كەزدەسۋ ۇيىمداستىرىلىپ، مەموراندۋمعا قول قويىلماق.
ونىڭ ۇستىنە بيىل وبلىستا تامشىلاتىپ جانە جاڭبىرلاتۋ ادىسىمەن سۋارىلاتىن ەگىستىك كولەمى ارتقان. ايتا كەتۋ كەرەك، بيىل وڭىردەگى اۋىل شارۋاشىلىعى سالاسىن قولداۋعا 6,5 ميلليارد تەڭگە ءبولىنىپ وتىر.
«بىلتىر بىزدە 8100 گەكتار تامشىلاتىپ سۋارۋ القابى بولدى. بيىلعى جىلى تاعى 3125 گەكتارعا قوسىمشا جاڭبىرلاتىپ جانە تامشىلاتىپ سۋارۋ جۇيەسىن ەنگىزەيىن دەپ وتىرمىز. سونىمەن، وسى جۇيە وبلىس بويىنشا 11 مىڭ گەكتاردان استام جەرگە ەنگىزىلەدى. سۋ قويمالارىندا سۋ جەتكىلىكتى»، دەپ اتاپ ءوتتى اۋىل شارۋاشىلىعى باسقارماسىنىڭ باسشىسى.
