ەلوردانىڭ تەاتر ارتىستەرى ءتول مەرەكەلەرىن تويلاۋدا - فوتو
«تەاتر ونەرىنىڭ جۇلدىزدارى قىزىل كىلەممەن ءجۇرىپ ءوتىپ، قۇتتىقتاۋلار قابىلدادى، ارىپتەستەرىنىڭ مەرەكەلىك قويىلىمدارىن تاماشالادى»، دەپ حابارلايدى قالانىڭ رەسمي سايتى.
مەرەكەلىك باعدارلاما باسىندا استانا قالاسى اكىمىنىڭ ورىنباسارى ەرمەك امانشايەۆ ەلوردالىق تەاترلاردىڭ شىعارماشىلىق ۇجىمدارىن قۇتتىقتاپ، ولارعا شىعارماشىلىق تابىس پەن شابىت تىلەدى.
«تەاتر - جاڭا بوياۋلارمەن، سيقىرلى دىبىستارمەن جانە ساحنالىق قۇبىلىستارمەن باۋراپ الاتىن ۇلى ونەر. سىزدەردى، ارىپتەستەرىمدى وسى ءبىر كەرەمەت مەرەكەمەن قۇتتىقتايمىن. مۇندا ەلوردانىڭ مادەني ءومىرىنىڭ ماڭىزدى بولىگىنە اينالعان تەاتر قىزمەتكەرلەرى جينالدى. سوڭعى جىلدارى تەاترلارىمىز حالىقارالىق فەستيۆالداردا گران- پري يەلەنىپ ءجۇر، بۇل قاجىرلى ەڭبەكتەرىىزدىڭ جانە تالانتتارىڭىزدىڭ ارقاسى، بارشاڭىزعا تابىس تىلەيمىن»، - دەدى ە. امانشايەۆ.
ەلوردالىق ۇزدىك جەتى تەاتردىڭ ارتىستەرى ەلوردا اكىمى ادىلبەك جاقسىبەكوۆتىڭ اتىنان العىس حاتتارمەن ماراپاتتالىپ، سىيلىقتار قابىل الدى.
شارا بارىسىندا تەاترلاردىڭ جاس شىعارماشىلىق ۇجىمدارى كوپشىلىك نازارىنا مەرەكەلىك باعدارلاما ۇسىندى: ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، م. گوركيي اتىنداعى مەملەكەتتىك اكادەميالىق ورىس دراما تەاترى، «جاستار» تەاترى، كوڭىلدى تاپقىرلار تەاترى، قۋىرشاقتار تەاترى، «ناز» مەملەكەتتىك بي تەاترى.
«ءبىزدىڭ تەاتردىڭ جاس ارتىستەرى وتە دارىندى. قىزدار دا، جىگىتتەر دە كرەاتيۆتى، ىنتالى. ءوز اتىمنان وسى سالانىڭ بارلىق قىزمەتكەرلەرىن حالىقارالىق تەاتر كۇنىمەن قۇتتىقتايمىن! بارلىعىنا دەنساۋلىق، بەيبىتشىلىك، شىعارماشىلىق تابىس تىلەيمىن»، - دەدى ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتريساسى اينۇر جۇگىنىسوۆا.
ايتا كەتەيىك، دۇنيەجۇزىلىك تەاتر كۇنى - جىل سايىن بارشا الەمدە 27 - ناۋرىزدا اتالىپ وتەدى.
