كومپيۋتەر جازعان اڭگىمە جاپونياداعى ادەبي بايقاۋدىڭ اقتىق سىنىنا ءوتتى

استانا. قازاقپارات - حاكوداتە بولاشاق ۋنيۆەرسيتەتىنىڭ عالىمدارى جاساندى ينتەللەكتىمەن بىرلەسە وتىرىپ اڭگىمە جازدى، شىعارما حوسي سينيتي اتىنداعى ادەبي بايقاۋدىڭ اقتىق سىنىنا ءوتتى،

 دەپ حابارلايدى The Japan News.

Nikkei Shinichi Hoshi Literary Award بايقاۋىنا تاپسىرىلعان  1450 شىعارمانىڭ 11- ءى الگوريتمدەر كومەگىمەن جازىلعان. «كومپيۋتەر رومان جازعان كۇن» اتتى شاعىن پوۆەست باس جۇلدەنى الماسا دا ىرىكتەۋدىڭ ءبىرىنشى كەزەڭىنەن وتكەن. بايقاۋدىڭ قازىلارى شىعارمانى ادام ەمەس كومپيۋتەر جازعانىن بىلمەگەن.

«بۇعان دەيىن جاساندى سانانى جاۋابى بار ەسەپتى شىعارتۋعا، ويىندار ويناۋعا پايدالانىپ كەلدىك. ەندى ءبىز نەيروجەلىنى تۆورچەستۆومەن اينالىسۋىن سىناپ كوردىك»، - دەيدى جازۋشى روبوتتى ازىرلەگەن حيتوسي ماتسۋبارا. الگوريتم اڭگىمە قۇراي الۋى ءۇشىن عالىمدار وعان قاجەتتى دەرەكتەردى - باس كەيىپكەردىڭ جىنىسى، سيۋجەتتىڭ سيپاتتاماسى، سونداي- اق نەگىزگى ءتول سوزدەر مەن سويلەمدەردى ۇسىنعان. تەحنولوگيانىڭ باسقا ەرەكشەلىكتەرى قۇپيا ۇستالۋدا.

بايقاۋعا قاتىسقان فانتاست جازۋشى ساتوشي حاسەنىڭ ايتۋىنشا، پوۆەستىڭ قۇرىلىمى جاقسى بولسا دا ونداعى كەيىپكەرلەر جەتكىلىكتى سۋرەتتەلمەگەن.

جازۋشىلىقپەن اينالىسقان جاساندى ينتەللەكتىڭ اڭگىمەسى: «كومپيۋتەر ادامدارعا جۇمىس ىستەۋدەن باس تارتىپ ءبىرىنشى ورىنعا ءوزىنىڭ ىقىلاسى اۋعان دۇنيەنى قويدى»، دەپ باستالادى.