الەم اپتا ىشىندە: لاڭكەستەر بەلگيانىڭ اتوم ەلەكتر ستانسالارىن جارماق بولعان

استانا. قازاقپارات - ءوتىپ بارا جاتقان اپتادا قارت قۇرلىقتىڭ قاق تورىندە ورنالاسقان بەلگيا استاناسى بريۋسسەلدە ءبىرقاتار لاڭكەستىك ارەكەت ورىن الدى.

الدىمەن لاڭكەستەر اۋەجايدا قۋاتتى جارىلىس جاساپ، ودان كەيىن مەتروعا شابۋىل جاسادى.

اۋەجاي مەن مەتروداعى جارىلىس

سەيسەنبى كۇنى جەرگىلىكتى ۋاقىت بويىنشا شامامەن تاڭعى ساعات 8 دەردە بريۋسسەلدىڭ حالىقارالىق اۋەجايىنىڭ ۇشۋ الاڭىندا 2 جارىلىس ورىن الدى. جارىلىس سالدارىنان تەرمينال عيماراتى جارتىلاي قيرادى. وقيعا ورىن العاننان كەيىن جولاۋشىلار اۋەجايدان بىردەن قاۋىپسىز جەرگە كوشىرىلدى. بارلىق اۋە رەيىستەرى كەيىنگە قالدىرىپ، قونۋى ءتيىس ۇشاقتار تاياۋ قالالارداعى اۋەجايلارعا باعىتتالدى.

ءبىر ساعاتتان كەيىن كەزەكتى جارىلىس ەۋروپالىق ينستيتۋتتار كەڭسەسى ورنالاسقان كوشەگە تاقاۋ تۇستاعى «ماەلبەك» ستانساسىندا ورىن الدى.

بەلگيا پرەمەر- ءمينيسترى شارل ميشەل وسى وقيعادان كەيىن بىردەن ۇلتتىق قاۋىپسىزدىك كەڭەسىن شاقىردى. ەلدە لاڭكەستىك ءقاۋىپتىڭ ەڭ جوعارى دەڭگەيى ەنگىزىلدى.

«بۇل قاسىرەتتى، قارالى كۇن. مەن بارلىعىن دا تىنىشتىق پەن نيەتتەستىككە شاقىرامىن»، - دەدى ول.

بريۋسسەلدە قوعامدىق كولىكتەردىڭ جۇمىسى توقتاتىلىپ، مەملەكەتتىك مەكەمەلەر، بالالار مەن وقۋ ورىندارى، سونىمەن قاتار ادامدار كوپ جينالاتىن ساۋدا ورتالىقتارى، تەاترلار مەن كينوتەاترلار جابىلدى. قوعامدىق ءتارتىپتى قورعاۋ ءۇشىن قالاعا مىڭعا جۋىق قوسىمشا ارميالىق بولىمشە تارتىلدى. بريۋسسەلدىڭ ءبىرقاتار كوممۋناسىندا پوليتسيا تەكسەرۋ جۇرگىزدى.

ءسال كەيىنىرەك بەلگيانىڭ فەدەرالدى پروكۋراتۋراسى بارلىق جارىلىستى لاڭكەستىك ارەكەت دەپ تانىپ، اۋەجاي مەن مەتروداعى جارىلعىش زاتتى لاڭكەس- جانكەشتى ىسكە قوسقاندىعى تۋرالى اقپاراتتى قۋاتتادى.

رەسمي دەرەكتەرگە سايكەس، لاڭكەستىك سالدارىنان 300 دەن استام ادام زارداپ شەگىپ، قازا تاپقانداردىڭ سانى 31 ادامعا جەتتى. دەگەنمەن بۇل سوڭعى مالىمەت ەمەس. ويتكەنى، بىرنەشە ونداعان ادام ءالى دە اۋىر حالدە جاتىر.

تەراكتىنى تەكسەرۋ جالعاسۋدا

سول كۇنى كەشكە قاراي بۇقارالىق اقپارات قۇرالدارىندا بريۋسسەل اۋەجايىنىڭ بەينەباقىلاۋىنا ءتۇسىپ قالعان لاڭكەستەردىڭ سۋرەتى جاريالاندى. فوتودا ءۇش ەركەك بەينەلەنگەن، ونىڭ ەكەۋى لاڭكەس بولسا، ءۇشىنشىسى - ولاردىڭ ىمىرالاستارى.

ءسال كەيىنىرەك پوليتسيا اۋەجايدا ءوزىن- ءوزى جارىپ جىبەرگەن جانكەشتىنىڭ اتى-ءجونىن جاريا ەتتى. ولار بريۋسسەلدە ەر جەتكەن نادجيم لاحراۋي مەن يبراگيم ءال- باكراۋي بولىپ شىقتى. ءبىر ساعاتتان كەيىن يبراگيمنىڭ اعاسى حاليد مەترودا ءوزىن- ءوزى جارىپ جىبەردى.

«جارىلىس پويىز «ماەلبەك» ستانساسىندا تۇرعان كەزدە ەكىنشى ۆاگوننىڭ ىشىندە ورىن العان. جانكەشتىنىڭ كىم ەكەندىگى ساۋساق ىزدەرىمەن انىقتالدى. ول يبراگيمنىڭ اعاسى 1989 -جىلى 12 قاڭتاردا بريۋسسەلدە دۇنيەگە كەلگەن حاليد ءال- باكراۋي»، - دەدى باسپا ءسوز ءماسليحاتى بارىسىندا فەدەرالدى پروكۋرور.

لاڭكەستىك ارەكەتتەردى تەرگەۋ جانە اۋەجايداعى ءۇشىنشى جارىلىستىڭ الدىن الۋعا لاڭكەستەردى اۋەجايعا الىپ كەلگەن تاكسي جۇرگىزۋشىسى كوپ كومەك كورسەتتى. كۇدىكتىنى سۋرەتىنەن تانىعان ول جولاۋشىلارىنىڭ ءۇش ەمەس ودان دا كوپ سومكە اكەلگەندىگىن ايتىپ بەردى. ءدال وسى مالىمەتتەر بريۋسسەل اۋەجايىنداعى ءۇشىنشى بومبانى تابۋعا كومەكتەستى. مۇنان بولەك، تاكسي جۇرگىزۋشىسىنىڭ دەرەكتەرى قۇقىق قورعاۋ ورگاندارىنا بريۋسسەلدەگى كوممۋنالداردىڭ بىرىندەگى تۇرعىن ۇيدە ورنالاسقان جارىلعىش زاتتار جاسايتىن جاسىرىن زەرتحانانى تابۋعا سەپتىگىن تيگىزدى.

جارىلىستان كەيىن بەلگيا ىشكى ىستەر ءمينيسترى يان يامبون مەن ادىلەت ءمينيسترى كوەن گەنس وتستاۆكاعا ءوتىنىش بەرگەنىمەن ونى ەل ۇكىمەت باسشىسى قابىلداعان جوق.

بريۋسسەلدەگى جارىلىسقا بايلانىستى الەمنىڭ كوپتەگەن ەلدەرىنىڭ كوشباسشىلارى بەگيالىقتارعا كوڭىل ايتتى. ولاردىڭ قاتارىندا قازاقستان پرەزيدەنتى نۇرسۇلتان نازاربايەۆ تا بولدى. ەلباسى بريۋسسەل قالاسىندا بولعان تەررورلىق اكتىگە بايلانىستى بەلگيا كورولى فيليپپكە كوڭىل ايتۋ جەدەلحاتىن جولدادى. نۇرسۇلتان نازاربايەۆ قازا بولعانداردىڭ تۋعان- تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى. مەملەكەت باسشىسى ەلىمىز حالىقارالىق قاۋىپسىزدىككە قاتەر توندىرەتىن تەرروريزم مەن ەكسترەميزمنىڭ كەز كەلگەن ءتۇرىن ايىپتايتىنىن جانە وسىنداي قيىن ساتتە بەلگيا حالقىن جان- جاقتى قولدايتىنىن ايتتى.

لاڭكەستەر يادرولىق شابۋىل ۇيىمداستىرماق بولعان

جەرگىلىكتى ب ا ق- تىڭ جازۋىنشا، لاڭكەستەردىڭ نەگىزگى نىسانى بەلگيالىق اتوم ەلەكتتر ستانساسى بولۋى ءتيىس ەدى. ويتكەنى، اعايىندى ءال- باكراۋيلەر ۇزاق ۋاقىتتان بەرى بەلگيالىق اتوم ەنەرگەتيكاسى سالاسىنداعى زەرتتەۋلەر جانە دامۋ باعدارلاماسى جەتەكشىلەرىنىڭ ءبىرىنىڭ ءىزىن اڭدىعان. ايتا كەتەرلىگى، بەلگيادا «دۋل» جانە «تيانج» دەپ اتالاتىن ەكى اتوم ەلەكتر ستانساسى جۇمىس ىستەپ تۇر. ال ولاردىڭ اپاتقا ۇشىراۋى بىرنەشە مىڭداعان ادامنىڭ ومىرىنە ءقاۋىپ توندىرەر ەدى. الايدا لاڭكەستەردىڭ جوسپارىن قىلمىستىق توپ مۇشەلەرىنىڭ ءبىرى سالاح ابدەسلامنىڭ تۇتقىنعا ءتۇسۋى بۇزعان. ول وتكەن جىلدىڭ 13 -قاراشاسىندا پاريجدە ورىن العان لاڭكەستىك ارەكەتتەرگە باستى كۇدىكتى بولىپ وتىر.

لاڭكەستىك ارەكەتتەردى تەرگەۋ ءالى دە جالعاسۋدا. قازىرگى ۋاقىتتا 7 ادامنىڭ تۇتقىنعا الىنعانى جايىندا اقپارات بار. تاياۋ ارالىقتا الەم جۇرتشىلىعى ەۋروپا تورىندەگى لاڭكەستىكتەردىڭ كىم ۇيىمداستىرعانىن بىلەتىن بولادى.

اۆتور: مارلان جيەمباي