قىتايعا العاش رەت وسىمدىك مايى تيەلگەن كونتەينەرلىك قۇرام جونەلتىلدى
شارا سالتاناتتى تۇردە ءوتىپ، وعان «ق ت ج» ۇلتتىق كومپانياسى، قازاقستاندىق وندىرۋشىلەر، قىتايدىڭ «ايتسزيۋي» كومپانياسى، الماتىداعى ق ح ر كونسۋلدىعىنىڭ وكىلدەرى قاتىستى. بۇل تۋرالى ۇلتتىق كومپانيانىڭ باسپا ءسوز قىزمەتىنەن حابارلادى.
مايدىڭ العاشقى پارتياسىن تاسىمالداۋ قازاقستان- قىتاي ىنتىماقتاستىعى مەن ساۋدا- ساتتىق قارىم- قاتىناسىن جاقسارتىپ، ەكى مەملەكەت اراسىنداعى كونتەينەرلىك تاسىمالداردىڭ سانىن ارتتىرۋ ماقساتىندا جۇزەگە اسىرىلدى. KTZ Express ۇلتتىق مۋلتيمودالدىق وپەراتور بۇل جوبانى China Railway International Multimodal Transport Co Ltd (CRIMT) كومپانياسىنمەن بىرلەسە اتقاردى.
ق ح ر باس كونسۋلىنىڭ ورىنباسارى مياو حۋنبو اتالعان جوبا ەكى مەملەكەت اراسىنداعى بايلانىستىڭ، «ءبىر بەلبەۋ - ءبىر جول» جوباسى مەن ۇلى جىبەك جولى يدەياسىنىڭ ناتيجەسىن كورسەتىپ وتىرعاندىعىن اتاپ ءوتتى. بۇگىندە قىتاي قازاقستاندا جالپى سوماسى 24 ميلليارد دوللاردى قۇرايتىن 52 جوبانى جۇزەگە اسىرۋدا. سولاردىڭ ءبىرى - ايدزيۋ كومپانياسىنىڭ وسىمدىك مايىن تاسىمالداۋ جوباسى. قازاقستاندىق ءونىم حالىق سانى 35 ميلليون ادامعا جەتەتىن شانشي پروۆينسياسىنا جەتكىزىلەدى.
«بۇل جوباعا ەرەكشە دەن قويۋىمىزدىڭ ءبىر سەبەبى - شانشي جىبەك جولىنىڭ ەڭ باسىندا ورنالاسقان. دەمەك، قازاقستان مەن شانشي اراسىنداعى سەرىكتەستىكتىڭ بولاشاعى مول»، - دەدى ول.
دوستىق ستانساسى باسشىسىنىڭ ورىنباسارى جاندوس ءابدىماناپوۆتىڭ ايتۋىنشا، دوستىق- الاشاڭقاي اراسىنداعى تىعىز بايلانىستىڭ ورناعانىنا 25 جىلدان استى. ينفراقۇرىلىمى جەتىك زاماناۋي ستانسالار قالىپتاسىپ، جۇك تاسىمالىنىڭ كولەمى ارتقان، استانا- ءۇرىمجى، الماتى- ءۇرىمشى باعىتى بويىنشا جولاۋشىلار تاسىمالى رەتتەلگەن. قازاقستاندىق ونىمدەردى ەكسپورتقا شىعارۋ ماقساتىندا كونتەينەرلىك تاسىمالدارعا ەرەكشە كوڭىل بولىنەدى. 2014 -جىلعى كورسەتكىشتەرمەن سالىستىرعاندا كونتەينەرلىك پويىزدار سانى بۇگىندە 173 پايىزعا كوپ. 2015 -جىلى 12 ايدا يمپورت بويىنشا 428 كونتەينەرلىك پويىز قاتىناعان، ولاردىڭ ەۋروپاعا بارعانى - 376. كونتەينەرلىك پويىزدار پولشا، گەرمانيا، تۇركيا، ازەربايجان، يسپانيا سياقتى ەلدەرگە جۇرەدى.
«ايتسزيۋي» شيان يندۋستريالدىق كورپوراتسياسىنىڭ جەتەكشىسى جيا حەي وندىرىستەرىن ماي، بيداي جانە ەت ونىمدەرىمەن تولىقتىراتىندىعىن ايتۋدا. وعان 15 ميلليون دوللار ينۆەستيتسيا قۇيۋ جوسپارلانعان. ازىرگە كومپانيا قازاقستاندىق ءونىم تيەلگەن 20 عا جۋىق كونتەينەرلىك پويىز جىبەرمەك، كەيىنەن ولاردىڭ سانىن جىلىنا 50 گە دەيىن جەتكىزۋ جوسپاردا بار.
اۆتور: مارلان جيەمباي
