ورالدا ونەر قايراتكەرى ق. قاجىموۆتىڭ شىعارماشىلىق كەشى ءوتتى - فوتو
ەل تاۋەلسىزدىگىنىڭ 25 جىلدىعى جانە ع. قۇرمانعاليەۆ اتىنداعى وبلىستىق فيلارمونيانىڭ 50 جىلدىعى اياسىندا وتكەن كەشتە داۋلەتكەرەي اتىنداعى قازاق حالىق اسپاپتار وركەسترىنە مەرەيتوي يەسىمەن قاتار ەلىمىزدىڭ ءتۇرلى قالالارىنان كەلگەن تانىمال ونەر قايراتكەرلەرى ديريجەرلىك ەتتى. ساحنادا قازاقستاننىڭ ەڭبەك سىڭىرگەن ارتىستەرى جۇماعانىم راحىموۆا، ساۋلە تاۋدايەۆا، ەلىمىزدىڭ ەڭبەك سىڭىرگەن قايراتكەرلەرى حاتيموللا بەردىعاليەۆ، مۇرات ءامىرحانوۆ سىندى بەلگىلى انشىلەر ونەر كورسەتتى. كەشتە قىرىمگەرەي قاجىموۆتىڭ دا اندەرى ورىندالدى.
25 -ناۋرىز كۇنى ق. قاجىموۆتى وبلىس اكىمى نۇرلان نوعايەۆ مەرەيتويىنا بايلانىستى قابىلداپ، قۇرمەت كورسەتتى. كەزدەسۋدە وڭىردەگى مادەنيەت پەن ونەردىڭ دامۋى، بيىل قۇرىلعانىنا 50 جىل تولىپ وتىرعان ع. قۇرمانعاليەۆ اتىنداعى وبلىستىق فيلارمونيانىڭ جۇمىس جوسپارلارى جونىندە اڭگىمە بولدى. وسى اتاۋلى مەرەكەگە وراي داۋلەتكەرەي اتىنداعى قازاق حالىق اسپاپتار وركەسترى وبلىستىڭ ون ەكى اۋدانىن تۇگەلدەي ارالاپ شىقپاقشى. وركەستر تەك اۋدان ورتالىقتارى عانا ەمەس، اۋىلدىق وكرۋگتەردە دە ءوز ونەرلەرىن كورسەتەتىن بولادى.
ايتا كەتەيىك، 1946 -جىلى 19 ناۋرىزدا قازىرگى تەرەكتى اۋدانى تانتەن ەلدى مەكەنىندە دۇنيەگە كەلگەن قىرىمگەرەي قاجىموۆ الدىمەن ورال مۋزىكا ۋچيليشەسىن، سودان كەيىن قۇرمانعازى اتىنداعى كونسەرۆاتوريانى ءتامامدادى. قۇرمانعازى اتىنداعى مەملەكەتتىك اكادەميالىق قازاق ۇلت اسپاپتار وركەسترى مەن مەملەكەتتىك سيمفونيالىق وركەستر قۇرامىندا كوپتەگەن ەلدەردە ءوز ونەرلەرىن كورسەتتى. 1991 -جىلى ورال مۋزىكا ۋچيليشەسىنىڭ ديرەكتورى بولىپ تاعايىندالعان ق. قاجىموۆ سودان بەرى باتىس قازاقستاندا قىزمەت اتقارىپ كەلەدى. 2000 -جىلى فيلارمونيا جانىنان وبلىستىق حالىق اسپاپتار وركەسترى قۇرىلىپ، وعان كوركەمدىك جەتەكشى ءارى باس ديريجەر رەتىندە جەتەكشىلىك ەتتى. بۇگىندە داۋلەتكەرەي اتىنداعى وركەستر شەت ەلدە دە ونەر كورسەتىپ، كوپكە تانىلىپ ۇلگەردى. قىرىمگەرەي قاجىموۆ ديريجەرلىك ەتىپ، كونتراباس اسپابىندا ويناۋمەن بىرگە ءوزى اندەر شىعارادى. سونداي- اق وركەسترگە ارنالىپ جازىلعان «جايىق تولعاۋى» اتتى پوەماسى دا بار.
