الەمدەگى ەڭ كۇشتى بالا ارمانىن ايتتى

استانا. قازاقپارات - الەمدەگى ەڭ كۇشتى بالا كاباردين- بالقار رەسپۋبليكاسىندا تۇرادى.

الەم جۇرتشىلىعى جامبۋلات حاتوحوۆ ەسىمدى كاباردى بالاسىنىڭ ەسىمىن ەڭ العاش رەت 2003 -جىلى ەستىدى.

سول كەزدە جاسى 3 كە ەندى تولعان الىپ ۇلدىڭ سالماعى 17 كيلو تارتىپتى. ال تاعى ءتورت جىلدان كەيىن ورتا مەكتەپتىڭ ءبىرىنشى سىنىبى تابالدىرىعىنان اتتاعان ونىڭ سالماعى 115 كيلوعا ءبىر-اق جەتىپتى، دەپ جازادى «ەگەمەن قازاقستان» گازەتى.

سول جامبۋلات قازىر 16 عا تولىپ، جاسوسپىرىمدىك كەزەڭگە كەلگەن. ونىڭ قازىرگى سالماعى 226 كيلودان اسادى. ءبىر ايتارلىعى، بوزبالا كىشكەنە كۇنىندە دە، بۇگىندەرى دە تاماقساۋلىقپەن ەشبىر كوزگە تۇسپەگەن، ءوزى قاتارلى بالالاردىڭ تابەتىندەي مولشەردە اۋقات ءىشىپ جۇرگەن، سالماعى قانشالىقتى كوپ بولعانىنا قاراماستان، دەنە قيمىلىن جاساۋدا ابجىلدىك پەن ەپتىلىك كورسەتە بىلەدى، الۋان ءتۇرلى سپورتتىق ويىندار ويناعاندى جاقسى كورەدى.

بالانىڭ اناسى جامبيكا ۇلىنىڭ بۇلايشا الىپ بولىپ تۋۋىنا تۇقىم قۋالاۋشىلىق سەبەپ ەكەنىن ايتادى. ونىڭ «بوگاتىر» دەگەن لاقاپ اتى بار اتاسى زور تۇلعالى كىسى بولىپتى. كەزىندە دارىگەرلەر جامبۋلاتتى تاماقتان قاتتى قىسىپ، ديەتاعا وتىرعىزىپ قويۋعا دا كەڭەس بەرگەن ەكەن. ءبىراق بالا بىردەن قاتتى ارىقتاپ كەتۋگە كەلىسپەگەن، وزىندەي بالالاردىڭ جەگەنىن جەپ جۇرە بەرگەندى قالاعان. سوسىن ونىڭ وسى ۋاجىنە ءبارى توقتاعان.

جاسى 16  عا كەلگەنگە دەيىن «الەمدەگى ەڭ كۇشتى بالا» بىرنەشە تەلەشوۋعا كورىك بەرىپ، دەرەكتى فيلمدەرگە ءتۇسىپ ۇلگەرىپتى. سونىڭ ىشىندە جاپونيا مەن ۇلى بريتانيادان كەلگەن جۋرناليستەردىڭ شاقىرۋلارى بويىنشا حابارلارعا قاتىسقان. وسىلاي الىپ بولىپ تۋعان جامبۋلات ەندى سۋمو كۇرەسىنىڭ شەبەرى اتانىپ، وليمپيالىق ويىنداردىڭ مەدالىن جەڭىپ الۋدى ارمانداپ جۇرگەن كورىنەدى.