قۇرت - قازاقتىڭ ۇلتتىق تاعامى
قۇرتتىڭ تۇرلەرى دە بولادى. بۇگىن وسى تۋرالى ايتا كەتكەندى ءجون ساناپ وتىرمىز.
جاس قۇرت. سۇزبەدە تۇرعان قۇرتتى سارى مايمەن جەنتەكتەپ باستىرما رەتىندە شايمەن بىرگە داستارقانعا قويادى. اسىرەسە كەپكەن قۇرتقا، باۋىرساققا ءتىسى وتپەيتىن قارتتار ءۇشىن تاپتىرمايتىن اس سانالادى. ەرتەرەكتە جاس قۇرتتى قۇيرىق-باۋىرعا قوسقان. قۇرتتىڭ سارىسۋىن ءسۇت قوسىپ قايناتىپ، ىرىمشىك جاساعان، اۋىرعان مالعا ىشكىزگەن، ايەلدەر باس جۋعان.
ىستىق قۇرت. قايناپ جاتقان قۇرتتى الىپ، ماي قوسىپ ساپىرىپ ىشەتىن كەنەۋلى اس. وكپە اۋرۋىنا، سۋىق ءتيىپ اۋىرعان سىرقاتتارعا ەم سانالعان.
سىقپا قۇرت. مۇنىڭ قايناتقان كۇرتتان ايىرماشىلىعى سول اشىعان ايران قاپقا كۇيىپ سۇزىلەدى دە تۇزدالىپ، ءارتۇرلى ۇلگىمەن بولشەكتەلىپ تاقشاعا كەپتىرىلەدى. سىقپا قۇرت تا باستىرما رەتىندە پايدالانىلعان. مۇنداي قۇرت جايعان ايەل اۋىل بالالارىنا ارناپ دوڭگەلەك جاساپ، جىپكە ءتىزىپ مويىندارىنا ءىلىپ قۋانتۋ سالتى بولعان.
ەزگەن قۇرت. سورپاعا، تۇزدىققا، كوجەگە جانە باسقا تاعامدارعا قوسۋ نەمەسە سۇيىق كۇيىندە ءىشۋ ءۇشىن كەپكەن قۇرت استاۋعا سالىپ ۇنتاقتالادى، كەلىگە تۇيىلەدى نەمەسە قول ديىرمەنگە تارتىلادى. ەزىلگەن قۇرتتىڭ تاۋسىنشاق تۇيىرشىكتەرى، ول ءارى جۇمساق، ءارى سۇيكىمدى اس سانالادى. ونى سۋعا نەمەسە سۇتكە قوسىپ دايىندالعان تاعامدى مالتا دەپ اتايدى.
اقمالتا - وسى ەزگەن قۇرتتىڭ ەڭ سوڭعى شايىندىسى. ول وتە جۇعىمدى جانە تەز سىڭەتىن تاعام بولىپ سانالادى، ونى سول سۇيىق تۇرىندە ىشەدى.
ۇنتاق قۇرت. ارنايى ءتۇيىپ ۇساتقان نەمەسە قاپ تۇبىنەن جيناپ العان ۇگىندى. ونى ءسۇتتىڭ پىسكەن قايماعىنا بىلعاپ جەيدى. قۇرت-ماي، سارى مايعا باتىرىپ تاباق جاسايتىن كەپكەن سىقپا جالپاق قۇرت. ونى اسىعىس كەزدە ءدام تاتتىرۋ ءۇشىن نەمەسە جەڭىل-جەلپى تۇستىك رەتىندە داستارقانعا قويادى. كەيدە قۇرت، ىرىمشىك، ماي تاعامدارىنىڭ قوسىندىلارى دا قۇرت-ماي دەپ اتالادى.
قۇرت-كوجە. سورپاعا، كوجەگە قۇرت ەزىپ ءىشۋ قازاق اراسىندا كوپ تاراعان قادىرلى اس.
Baq.kz
