الماتىدا دوڭگەلەك شىنى ءۇي سالىنادى - فوتو

استانا. قازاقپارات - الداعى جىلى الماتىدا جاس ساۋلەتشى ايبەك الماسوۆتىڭ سيليندر ءتارىزدى ەرەكشە ءۇيىنىڭ قۇرىلىسى باستالادى، دەپ جازادى «ەگەمەن قازاقستان» گازەتى بۇگىنگى سانىندا.

جان-جاعىن 360 گرادۋستا ەمىن-ەركىن باقىلاۋعا بولاتىن شىنى ءۇي 4 قاباتتان تۇرادى. ءۇيدىڭ قاق ورتاسىندا بيىكتىگى 12 مەترگە جەتەتىن قاراعاي ءوسىپ تۇر. شىنى عيماراتتىڭ مەتالدان قۇيىلعان ءتورت تىرەۋىشى بار، ۇيگە ەنگەندەر اينالما باسپالداقپەن جوعارى كوتەرىلەدى. پەردە ىلىنبەگەن، كەدەرگى سۇيەنىش قويىلماعان، قابىرعا ەكى قابات شىنىدان جاسالعان. جوبا اۆتورىنىڭ العا قويعان ماقساتى - قالانىڭ قاجىتقان «تاس ورمانىنان» ءبىر مەزەتتە سىتىلىپ شىعىپ، تازا تابيعاتتىڭ اياسىندا تىنىعۋ.

قازىر جوباعا ەكى ينۆەستوردىڭ اڭسارى اۋىپ وتىرعانى ءمالىم بولدى. ولاردىڭ ءبىرى شىنى قابىرعالارعا كۇن باتارەيالارىن جاپسىرىپ، جاساپ شىعاراتىن زاۋىت يەسى ەكەن.

ءبىر سوزبەن ايتقاندا، «اشىق- شاشىق» بولعانمەن، بولاشاقتىڭ عيماراتى سانالاتىن شىنى ۇيدە قازىرگى تالاپقا ساي ەنەرگيا ۇنەمدەيتىن «جاسىل» تەحنولوگيا مولىنان پايدالانىلادى.

الماتىداعى ساۋلەت- قۇرىلىس اكادەمياسىنىڭ تۇلەگى ايبەك الماسوۆ بۇعان دەيىن BION- ۆەلوسيپەدىن جاساپ شىعارعان. كەلەشەگىنەن كوپ ءۇمىت كۇتتىرەتىن جاس ساۋلەتشى ەڭبەگىنىڭ جاناتىنىنا سەنىمدى. ونىڭ بەس ايدا قۇراستىرعان بۇل ءۇيى تاپسىرىس بەرۋشى ءۇشىن قازىرگى باعامەن ەسەپتەگەندە 86 ميلليون 250 مىڭ تەڭگەگە ءتۇستى.